考下各位鄉俚啲智商，不過千祈唔好當真！笑下就算！

呢十一條題，聽講話好深嘅，成日流流長至做到一題，仲話要智商成二百咁高先至可以全部解畫，係定唔係，
試過就知啦！
第一題
     有三條友去住客棧，三人房要三十蚊一晚。呢三條友每人畀十蚊，湊夠三十蚊交畀老闆，準備好好地瞓番晩。老闆見佢哋斯斯文文又咁爽手，就同佢哋講：今晚賣大飽，畀廿五蚊就搞惦，跟住拎返五蚊出嚟叫個後生畀返佢哋。點知個後生貪心，自己落咗格兩蚊，凈係畀返三蚊呢三條友，每人分返一蚊。
     依家問題嚟喇：開頭每人畀十蚊，后尾退返一蚊，十蚊減一蚊即係每人畀咗九蚊，三個人每人畀九蚊即係總共廿七蚊，加埋個後生自己落咗格嗰兩蚊，總共係廿九蚊。咦，仲有一蚊去咗邊度？
     呢條題，聽講話喺紐西蘭都考起好多人，咁各位鄉俚邊個知道呢？
第二題
     有個成日袋住十三撗算盤嘅老友去趁墟買蔥。見到個賣蔥佬擔住擔蔥，就問佢點賣法。個賣蔥佬話，啲蔥一蚊斤，呢度有一百斤。呢條十三撗又問，咁樣蔥白同蔥綠得唔得分開賣？賣蔥佬話，得，點解唔得啫？蔥白七毫一斤，蔥綠三毫一斤。呢條十三撗話，咁我買五十斤蔥白、五十斤蔥綠，找數。嗰個賣蔥佬計一計條數，蔥白七毫一斤，五十斤總共卅五蚊，蔥綠一斤三毫，五十斤總共十五蚊，兩條數加埋啱啱五十蚊。
     十三撗掟低五十蚊，陰陰笑擔住啲蔥走路。嗰個賣蔥佬就慘咯，點計都唔明：嗰擔蔥有一百斤，明明賣得一百蚊，點解分開咗賣，雖然都係賣咗一百斤，點解會水瓜打狗唔見一截，得番五十蚊？
     咁各位鄉俚，幫佢解下畫，咪返到屋企都唔知點樣同領導彙報噃！
第三題
     有個井成七公尺咁深，有隻蝸牛就唔想坐井觀天，一於向上爬睇下個花花世界。日頭爬咗上嚟三公尺，夜晚又線返落去兩公尺，唔知呢只蝸牛幾肘爬得出個井呢？
     咁各位鄉俚邊個知道呢？
第四題
    一個桃一毫，三個桃核換一個桃。依家你楂住一蚊，咁你食到幾多個桃？咁你又係點食呢？
第五題
     呢度有十二個乒乓波，個樣、顏色同大細都相同，不過其中有一個重量同其它嗰十一個唔同。依家畀你一部冇砝碼嘅的天秤，凈係准稱三次，睇下你有冇計將嗰個重量唔同嘅波搵到，之不過仲要知道佢係輕啲定係重啲。
     咁各位鄉俚邊個知道點樣稱呢？
第六題
    有個生意佬，騎住一隻驢，要行成千公里咁闊嘅沙漠，去賣三千條胡蘿蔔，依家知道呢只驢一次可以馱一千條胡蘿蔔，不過每行一公里，只驢就要食一條，咁樣嗰生意佬行出沙漠之後仲有幾多條胡蘿蔔賣呢？
第七題
     講古佬話有一日，有隻海盜船畀天上邊跌落嚟只牛耷到正，嗰五個時運低嘅懵佬冇計，凈得游水去到一個孤島。呢個孤零零嘅島上邊凈得一棵椰子樹，仲有……一隻馬騮！
     嗰五個時運低嘅懵佬夾手夾腳摘曬啲椰子落嚟，又凍又攰又肚餓，咁咪拍扁個頭瞓啰。
半夜有個以為自己冇咁懵嘅懵佬靜靜雞起身，將摘落嚟嗰堆椰子分成五份，仲剰番一個，咁就順手畀咗只馬騮，自己就偷偷雞收埋一份，剩低嗰啲又撈埋一堆放番喺原來嗰度，又靜靜雞扮冇嘢走返去瞓。
     冇幾耐，另外一個又係以為自己冇咁懵嘅懵佬靜靜雞起身，將摘落嚟嗰堆椰子分成五份，又係仲剰番一個，咁就順手畀咗只馬騮，自己就偷偷雞收埋一份，剩低嗰啲又撈埋一堆放番喺原來嗰度，又靜靜雞扮冇嘢走返去瞓。
     冇幾耐……
     冇幾耐……
     總之，呢五個時運低嘅懵佬都靜靜雞起過身，做過同樣嘅事。
     卒之捱到天光，呢五個時運低嘅懵佬都一齊起身，都以為自己做咗件醒過其他人嘅事，個個陰陰笑又將嗰堆椰子又分成五份，點知呢只馬騮真係行運行到腳趾公：今次分椰子又係仲剩低一個。咁就好似令狐沖話不戒和尚齋，理所當然不可不戒咁又將呢個椰子畀埋只馬騮。
     咁各位鄉俚邊個知道呢堆椰子一共有幾多隻？
第八題
     講古佬又話，有一個海島，上邊收藏咗好多好多宋朝最拉尾嗰個皇帝（即係陸秀夫孭住跳海嗰個）留低嘅金銀財寶，仲留低好多人嚟守住。
     過咗好耐好耐好耐，耐到嗰班人嘅後代都係剩番三個，嗰名就叫做阿大、阿二同阿三。
     你知阿大知道啲金銀財寶收藏喺山頂定係喺山腳，之不過佢紙下巴口輕輕，講嘢時真時假。凈得阿二知道阿大係講緊真話定係講緊假話，不過阿二有鋪癮，佢知道阿大講緊真話，佢就講真話，如果阿大講假話，佢就跟住車大炮。
     阿大同阿二都唔仲意講嘢，佢哋兩個都係好似依家舉手選舉咁，用舉左手或者舉右手嚟講畀你聽係定唔係。不過你就唔知佢哋用邊只手表示係，又用邊只手表示唔係。
     剩得阿三知道阿二講真嘢定係講流嘢，佢知道舉左手係乜，舉右手又係乜。阿三唔用動作，而係直接講畀你知係定唔係，不過阿三就死牛一邊頸，一係就句句真，珍珠都冇咁真，一係就句句假，仲假過賈雨村。不過你仲係唔知佢依家係珍珠都冇咁真呢定係假過賈雨村。
     咁各位鄉俚邊個知道點樣用最少嘅問題問到啲金銀財寶收藏喺山頂定係喺山腳呢？
     溫馨提示：如果你問阿三知唔知道啲金銀財寶收藏喺山頂定係喺山腳，呢條友一定會問返轉頭點先至可以知道啲金銀財寶收藏喺山頂定係喺山腳？咁搞法真係唔知邊個問邊個。
第九題
     喺公司嘅禮堂開大食會。
     行政科長因為博愛，同佢太座搞緊你死我活嘅階級鬥爭，冇講畀總務科長聽有幾多個人參加大食會。
     總之，如果三個人坐一圍枱，咁就多咗兩個人。如果五個人坐一圍枱，咁就多咗四個人。如果七個人坐一圍枱，咁就多咗六個人。如果九個人坐一圍枱，咁就多咗八個人。如果十一個人坐一圍枱，咁就啱啱好。
     總務科長撓曬頭……陰功，佢個頭本來就差唔多「亮了」。
     咁各位鄉俚邊個知道有幾多人參加大食會？又擺咗幾多圍枱？
第十題
     阿茂喺屋企請客，食西餐，所以想買番幾套刀叉。
     佢去咗阿壽間餐具鋪睇貨。
     阿壽嗰間鋪頭啲嘢幾齊全，直情可以講係平夾正，阿茂心惗買熟唔買生，決定就喺阿壽間餐具鋪買。
     佢計咗下數，發覺自己帶嚟嘅錢可夠買廿一把叉同廿一隻湯匙，或者買廿八把餐刀。不過，如果佢買嘅叉、湯匙同餐刀數量唔同，就配唔到套，所以佢要用盡帶去嘅錢嚟成套買。
     咁各位鄉俚邊個知道阿茂帶去嘅錢夠買幾多套餐具呢？
第十一題
     有個賊仔偷嘢被差佬睇到，差佬就追嗰個賊仔，賊仔梗係走甩褲都唔理啦！走下走下，前邊有條河仔攔住條路。呢條河仔有十二公尺闊，喺賊仔同差佬呢邊岸有棵枯咗嘅樹，樹葉都冇曬。有咁啱呢棵樹又係有十二公尺高，賊仔圍住嗰條頸巾有六公尺長。
     咁各位鄉俚邊個知道個賊仔點樣過河走甩？
     溫馨提示：啲差佬係冇頸巾發嘅。

第一條我已在」菩提樹下「論壇答覆了！

http://my.backchina.com/forum.ph ... &extra=page%3D1

講計數呀.........完全唔掂,如果計數掂,早就唔使做啦

你好嘢，犀利！

但係我就頭都大埋，陰功，計唔掂。

統統唔識，統統唔計，

上個月已經有人發表同樣問題，好多人都唔知點答。
唔去唸囉。

坐看雲起時 發表於 2010-11-20 13:26
呢十一條題，聽講話好深嘅，成日流流長至做到一題，仲話要智商成二百咁高先至可以全部解畫，係定唔係，
試 ...

鄉俚，係咪可以開估啦

......鄉俚，係咪可以開估啦......
統統唔識，統統唔計，哈哈哈哈！！！

坐看雲起時 發表於 2010-11-26 07:01
......鄉俚，係咪可以開估啦......
統統唔識，統統唔計，哈哈哈哈！！！

嘩，咁搞法，我地望到頸都長啦，原來唔開估。

嘩，咁搞法，我地望到頸都長啦，原來唔開估。
唔好意思呀大佬！冇計啦！讀書嗰陣，老師教落:知之為知之，不知為不知，是知也！
不過始終都係阿拉勿曉得，對唔住啰！

第一題舊時搞掂著，留翻第位公布。
第一題賣蔥佬搵自己笨。本來一蚊一斤，宜加分開賣七毫加三毫，即系兩斤賣一蚊。
第三題應該系五日，因為第四晚已經到第四公尺位置。
有時間翻來繼續。。。