港版「拉登」影真威水囖

激進港獨分子秘密製造重磅炸彈，諗住喺政改表決期間，鎖定政府總部及立法會大樓所在嘅金鐘同灣仔區發動襲擊，好彩警方及時揭穿大陰謀，制止咗一場可能釀成嚴重傷亡嘅暴力事件。
喺位於西貢蠔湧嘅亞視舊廠房「炸彈工場」入邊試爆炸彈時，百名探員出動圍捕，拘捕咗屬於「本土派」激進成員嘅九名男女，當中有人聲稱係本地激進組織成員。據悉，9名疑犯互相認識，與本地激進組織「全國獨立黨」有聯繫，部分人仲係核心成員添。咁「全國獨立黨」又有乜來頭咧？查實「全國獨立黨」於去年底至今年初佔領運動後成立，鼓吹港獨思想，又指會致力連結臺灣同香港嘅臺獨、港獨派別組織，形成一股新嘅獨立勢力，佢喺今年1月15日設立嘅facebook專頁仲警告，「倘若617通過政改表決，香港人要有心理準備當天會有傷亡，立法會將會變成第二個烏克蘭廢墟」。9名被捕者年介21至34歲，有學生、工人、教學助理以及無業人士，全部為本地人。其中人稱「拉登」嘅姓鄭疑犯，據瞭解，就係「全國獨立黨」成員之一，現年29歲嘅鄭偉成。佢曾經參與「光復元朗」反水貨客示威活動，並被控公眾地方藏有攻擊性武器罪。事後俾人大起底，仲搵到佢持槍嘅造型照，影真威水囖，十足十港版拉登喇。你咁淨，你大佬知唔知嘅？