舊料新報

舊料新報
正係惗緊慳番啲錢買張機票去澳門同何生斟下，皆因我哋貝殼村班鄉俚，同佢老友鬼鬼，睇睇抵下腍幫佢使番一千幾百萬，唔使佢搞到家嘈屋閉咁冇陰功，順便返廣州搵番啲好嘢食（頭搭尾，都有成三四年冇返過去嘞），於是乎密密咁打電話攞料，點知計嚟計去，慳到二零一三年都仲未慳到張機票，冇計。有咁啱阿洪七公嘅嫡傳弟子版主棒姐要攞料，話佢要喺二零一二年底前盡地一煲，擇良辰吉日而行，返鄉下，擦餐飽，啖盡天下美食，嘗遍嶺南佳肴。棒姐咁有豪氣，我哋點可以唔托下大腳擦下鞋？贊助使費就唔舎得嘞，唯有搵報料呢啲使銅銀夾聲大惠而不費嘅嘢嚟做啰！
個個都講「食在廣州」，呢句話真係真珠都冇咁真。廣州人識食、敢食，喺呢個世界認第二，就冇人敢認第一。有翼嘅除咗灰機，有腳嘅除咗橋凳，識游水嘅除咗火船潛水艇呢幾樣未食過，我真係惗唔到仲有啲乜東東係廣州人（講廣東人就啱啲，不過講慣咗，各位鄉俚大人有大量，有怪莫怪嘞）未食過、唔敢食嘅。
言歸正傳。廣州啲食街多到數唔曬，我哋成日牙斬斬自認老廣州，如果畀外省或者外國嘅朋友問到廣州有邊啲食街嗰陣，咁樣講就實行冇走雞：無論你喺廣州邊個旮旯，前後左右梗有一條係食街！就好似香港地有首廣告歌「7--11，常在你左右」，講文啲，就係「三步之內必有芳草」，呢句話都係真珠都冇咁真啩？
香港地成日講銀行多過米鋪，之不過喺廣州嘅舊城區，嗰啲大大細細嘅馬路、巷仔，可以冇銀行、冇米鋪，如果冇小食店，咁就世界變嘞！大大話，即使係喺紐約攞過唔知幾多條黑腰帶嘅「大胃王」，我都夠膽同佢哋輸賭：佢哋冇邊一個可以食通成條街。
跟住我呢份「指引」（講指引時髦啲），你會搵到荔灣、越秀、海珠三個老城區廿八檔特色小食，其中有啲係老字號新鋪面，有啲直情係新聞紙咁新，除咗啲地躉之外真係仲冇幾多個人知。不過，佢哋啲出品真係好！好！！食！！！如果你夠羌嚟個羅通掃北，下一屆紐約「大胃王」嘅黑腰帶，肯定係非君莫屬。
勁爆「大胃王」來了（「來了」要好似啲粵劇大老倌出場咁嘅發音至過癮）！！！
第十甫
第一站，係第十甫嘅「南信牛奶甜品專家」。首先整番份奶味十足嘅雙皮奶，仲可以整多一碗姜撞奶，微微哋啱啱好嘅甜味再加埋陣陣奶香，真係冇得頂。食完呢兩款頂頂有名嘅牛奶甜品，你會唔會覺得有啲啲多滯？如果覺得冇問題，恭喜！你已經得咗！！可以大踏步行去下一站！！！
•咁間鋪頭喺邊度？
南信牛奶甜品專家：荔灣區第十甫路四十七號。
寶華路
第十甫向西行轉彎屈入寶華路，又有三個搵食點。如果你仲嫌先頭食嘅甜品仲未夠喉，順記冰室嘅雪糕包保可以滿足你。椰子、芒果、榴槤三款特色水果雪糕都係用原只果肉製成，陣陣果香撲鼻，含喺嘴入邊等啲雪糕慢慢融化，嗰啲感覺真係冇得頂。呢度啲雪糕賣點係果香而唔係甜味，勁爆「大胃王」嘅胃口應該唔會頂唔順。
不過另外一間麵店嘅小食就難揀擇啲：香菇雲吞、鮮蝦雲吞、牛腩、豬手、排骨、豬腸呢啲凈食同湯麵，鮑魚汁、炸醬、花生醬等等各式撈麵都係十分馳名，每一樣都係麵條爽滑、湯底濃郁。無論你揀邊樣，牛三星湯都係首選必點。「牛三星」就係牛心、牛肚、牛腰，寶華麵店嘅牛三星爽口嫩滑不特止仲冇一啲腥味，加上酸蘿蔔同辣椒圈絕對係醒胃嘅美食。
仲有一個地方就係大名鼎鼎嘅、要入巷霸位嘅陳添記，爽口彈牙嘅魚皮配上正宗風味嘅老火艇仔粥，口感煙煙韌韌，味道同樣咁鮮香。食完魚皮同粥如果仲未夠皮，可以即刻去多寶路搵開記。
•咁間鋪頭喺邊度？
順記冰室：寶華路八十五號。
寶華麵店：寶華路一百一十七號。
陳添記：寶華路十五甫三巷二號之三。
多寶路
第三站嘅目標十分明確，就係喺多寶路嘅開記甜品。坐低即點香草綠豆沙同雲吞皮蛋花糖水，呢兩種可以講係廣式甜品嘅代表。廣州人都知道綠豆有清熱解毒嘅功效，煲成綠豆沙之後再加入香草就更加香，更加有效。蛋花糖水十分簡單，邊個人喺屋企都可以煲到，煲好蛋花糖水再放啲雲吞皮入去，即刻就有啲獨特嘅口感，好多人就是仲意試下嗰種「用嘴嚟啜」嘅過癮感覺。
•咁間鋪頭喺邊度？
開記甜品多寶路店：多寶路二百一十九號、三百一十八號。
華貴路
喺多寶路轉到寶華路，一路向北行就到咗華貴路。千祈要留意源記腸粉店，作為「西關老字號」，呢間鋪頭嘅拉腸柔軟可口，分量十足，童叟無欺。兼夾食得「乾淨利落」，真係人人受落。入邊嗰啲肉餡，更加係要慢慢嘆真啲。
•咁間鋪頭喺邊度？
源記腸粉店：華貴路九十三號。
龍津路
食完腸粉一路行到華貴路尾，即係到咗龍津路。就係兩條路嘅交叉路囗左近，成個廣州狀元及第粥最出名嘅伍湛記就喺呢度。伍湛記嘅及第粥係攞瑤柱、腐竹、豬骨用明火嚟煲粥底，喺品嘗鮮美味道嘅同時，用只匙羹撈一撈碗底，粥底下分量十足嘅用料就全部「蒲頭」，畀你一個大大嘅驚喜。最好送粥嘅，當然仲有呢度嘅咸煎餅。不過比咸煎餅更惹味嘅嘢，就係喺龍津東路驛巷嘅齋燒鵝同齋扎蹄，你千祈咪睇小呢兩種齋菜噃！原來都係系出名門：出自舊時有名嘅齋菜館--菜根香嘅廚師嫡系傳人之手。齋燒鵝用正宗嘅肇慶腐皮加埋啲祖傳秘方--獨特嘅調味做成，既形似又神似。雖然檔口細細十分簡陋，不過做出來嘅齋燒鵝同齋扎蹄柔軟可口極受歡迎。
•咁間鋪頭喺邊度？
伍湛記龍津中路店：龍津中路三百卅四號。
菜根香嫡系齋滷味：龍津東路驛巷十七號。
文昌路
啱啱喺龍津路食完，即刻好似趙子龍咁殺個回馬槍轉入去文昌路，去搵有名嘅招牌腸粉嘅發祥地--銀記腸粉文昌老店。銀記腸粉一九五八年新開張嗰陣係喺文昌北路一百六十七至一百六十九號，后尾老店搬到三百四十五號。自從連鎖經營之後，啲客仔驚銀記嘅質量會下降，今次專程返嚟老店食，實食得出原汁原味。
•咁間鋪頭喺邊度？
銀記腸粉文昌老店：文昌北路三百四十五號之一至之三。
西華路金花直街
喺銀記腸粉文昌老店行返到龍津路，直出向東再轉入康王北路，就可以嚟到西華路嘅金花直街。資深大胃王一睇路名就知道去搵乜好嘢食--呢度最正嘅就係牛羊雜湯。俗話講，酒香唔驚巷仔窄，主人家啲餸香，客仔又點會怕只狗惡？正所謂「窮居鬧市無人識，富在深山有遠親」，雖然呢個譬如好似有啲不倫不類，意思就差唔多。閑話少講，打鐵趁爐紅，三大招牌牛羊雜湯、牛三星、蘿蔔牛雜滾熱辣即叫即上即食，凍咗就唔好食嘞。
•咁間鋪頭喺邊度？
牛羊雜湯：金花直街金花廟後街三號。
長壽路
勁爆「大胃王」話仲未夠喉，仲要食廣州最正宗、最好食嘅伊面，咁就要再出番康王路向南行，到咗荔灣廣場就轉入長壽路向東行，唔使睇門牌，又唔使睇招牌，一路行，見到門口擺住一大玻璃櫃伊面嘅鋪頭就係堅記麵店。因為伊面通常都係喺擺壽酒嗰陣攞嚟做長壽麵，所以喺長壽路食伊面都算係實至名歸。堅記麵店歷史悠久，伊面更加係遠近馳名，口感「煙韌」。除咗首選「上湯伊面」，必食嘅仲有炸醬麵，嗰啲豬肉同醬料配搭得啱啱好，風味同北京嘅炸醬麵完全唔同，認真開胃。
•咁間鋪頭喺邊度？
堅記麵店：長壽東路二百九十九號。
海珠南
堅記嘅炸醬麵夠曬開胃，勁爆「大胃王」話兩隻手都末沾過啲油腥肥膩。咁就易話為啫！喺長壽路出人民路，南行再向東轉入大德路，經過一大片五金店之後，見到海珠南路右轉就可搵到林記粥品店。呢度帶油腥肥膩嘅就是三代祖傳嘅手藝--炸咸煎餅。林記有卅一年嘅歷史，炸出來嘅咸煎餅外圈軟，中間脆，配料咸中帶甜，風味獨特，再加上一碗瘦肉粥，就係最佳風味。
•咁間鋪頭喺邊度？
林記粥品店：海珠南路一百五十七號。
大佛寺前
廣州人仲意飲湯，一年四季，無論春夏秋冬，都有應節湯水。如果老婆大人唔識煲靚湯，出街求其打個「冷」，就見到有好多「靚湯專門店」，好似我上次講嘅喺中山六路解放路口雞林嗰間「阿二靚湯」就係其中之一。呢一站路有啲遠，不過要搵廣州之寶--靚湯，勁爆「大胃王」都勉為其難。喺海珠南返番去大德路向東行，經過解放路同廣州起義路左轉去惠福東路，再右轉過咗教育路就可以搵到大佛寺。舊陣物質匱乏，北京路（文革以前叫永漢路，解放前叫漢民路）新華書店附近就有間強記牛骨湯店（文革以前喺中山五路新華電影院旁邊，文革后搬咗嚟呢度）用牛骨紅豆煲咗老火湯出嚟賣，幫啲街坊補充下營養。大佛寺前嘅呢間肥媽大碗粉牛骨湯，凈係睇佢個名就可以勾起好多好多當年嘅回憶。啲牛骨湯凈係睇顏色就知道用料十足，整番一碗，飲到成頭汗，舒服曬。大碗粉啲味道唔算標青，不過勝在大碗，冇花冇假，連勁爆「大胃王」睇到都要伸下條脷。
•咁間鋪頭喺邊度？
肥媽大碗粉牛骨湯：惠福東路惠新中街大佛寺正門側邊。
文明路
飲完牛骨湯，食咗大碗粉，返出嚟惠福東路向東行幾步就到咗北京路，右轉跟住左轉就係文明路嘞。文明路除咗周生記太爺雞，仲有兩家最有名嘅甜品店--百花甜品同玫瑰甜品。百花甜品已經有三十幾年咁長嘅歷史，我哋讀書嗰陣成日偷偷地同女同學嚟呢度拖手仔撐枱腳食四季三寶，就係將香芋西米、紅豆沙、綠豆沙、蕎麥等撈埋一碗，非常有新鮮感。行多兩步就係玫瑰甜品，招牌美食係奶糊，杏仁豆腐同蕎麥薏米粥，聽講話仲有「食療」功效添。除咗甜品，老西關瀨粉都係一定要去食嘅，用正宗廣州做法做出來嘅瀨粉，香滑彈牙，加啲啲多豬油渣大頭菜辣椒粒喺上面更加惹味。仲有千祈要食齋燒鵝同炸魚皮，木桶飯有小小似泡飯，同瀨粉有異曲同工之妙。勁爆「大胃王」聽我講完食四季三寶呢段古，直情感動到「熱淚盈眶」，大叫伙記埋單，一於佢請客，話唔使我破費。嘩，咁都得！早啲講吖大佬！！咁我梗係帶你去廣州酒家食滿漢全席，求其作番段古就可以呃飲呃食啦！！！係咪？
•咁間鋪頭喺邊度？
百花甜品店：文明路二百一十號。
老西關瀨粉：文明路二百一十六號。
玫瑰甜品店：文明路二百一十八號。
中山三路
食咗甜品同正宗廣州老西關瀨粉，喺魯迅博物館三角市左轉，由越秀中嚟到大東門中山三路，喺呢度到中華廣場，沿路有好多茶餐廳同小食店，品種就多到講唔曬，任君品嘗。之不過勁爆「大胃王」話就算佢再飽，都要去佳叔湯丸王嗰間鋪食番幾粒，咪就白行咁話。主隨客便，一切OK。呢度嘅湯丸唔只有糖水底，仲可以同花生糊、綠豆沙等等其他甜品配搭；嗰啲薑汁湯丸仲話係「清甜和胃，唔怕食滯」。真係品種同味道都要有番咁上下水準，先至夠膽拍心口自稱係「湯丸王」。
•咁間鋪頭喺邊度？
佳叔湯丸王東山店：中山三路七十七號。
東川路
喺中山三路烈士陵園橫門省人民醫院右轉入東川路，要去喺呢度最爆棚嘅穗銀腸粉店。穗銀以前同銀記有啲睚眥，依家換咗招牌，不過啲客仔都一致認為質量唔曳。好嘅腸粉要睇好多細節：靚米漿、新鮮肉、美味豉油就係穗銀最大嘅賣點，我哋之前已經食過幾間鋪頭嘅腸粉，嚟到呢度勁爆「大胃王」都係嗰句：「有殺錯冇放過」，果然係眾望所歸。
•咁間鋪頭喺邊度？
穗銀腸粉店：東川路九十四號之一。
曉港
喺東川路食完腸粉，行東湖西路過海印橋，可以去到昌崗路嘅曉港地鐵站。呢度地鐵站D出口旁邊嘅秘制牛雜點可以唔食，間鋪頭仔個名梗係許冠傑起嘅，竟然叫做加加店，晤知係咪加加加加加，茶葉渣，紅豆沙，成日咁加任佢話？定係呢度啲牛雜人人食過返尋味，加完呢味又加呢味？不過呢度啲牛雜確實係又香又有咬囗，真係「零舎不同」（呢四個字要用普通話講），除咗慢慢嘆，仲要點啲佢哋特製嘅辣醬，咁先算食得出牛雜嘅真味道。
•咁間鋪頭喺邊度？
秘制牛雜加加店：昌崗路曉港地鐵站D出口旁邊。
江南大道中
勁爆「大胃王」食完一串串嘅牛雜仲係意猶未盡，仲話要去食都係一串串嘅麻辣燙。喺昌崗路轉入江南大道中，喺江南商業街旁邊有條街叫做南昌大街，喺呢度行到江南商業街後邊會你會見到一間麻辣燙，不過我就大頭蝦，擺曬烏龍，唔記得呢間鋪頭仔叫乜名，唔知會唔會個名又係許冠傑起嘅呢？附近的街坊都知道呢度配菜嘅調味汁同酸豆角真係非常之好味，間鋪頭仔經常坐滿客。食完麻辣燙，再喺江南大道中向北行，嚟到萬松路口，咁就搵到愉園美食嘞。各級大胃王對於愉園都算係久仰大名，呢度有兩樣嘢係一定要食嘅，呢兩樣就係鮮蝦雲吞面同炸醬麵。雖然我哋大大話話呢幾日都去過冇十間都有八間面鋪食鮮蝦雲吞面同炸醬麵，不過真係各有特色，雖然話雲吞嘅餡料同湯底都係大同小異啫，之不過肯喺「小異」上邊落功夫，就抵佢哋發達做食神。愉園美食嘅鮮蝦雲吞面嘅蝦肉大（老細話統統係用河蝦）所以啲雲吞亦夠大，味道香，湯底仲可以睇到一粒粒蝦籽，想唔好味都幾難。
•咁間鋪頭喺邊度？
唔記得呢間叫乜名嘅麻辣燙鋪頭仔：江南大道中南昌大街江南商業街（女人街）後邊。
愉園美食：江南大道中一百六十三號。
萬松園
愉園嗰碗蝦籽湯底飲到美（國）人照鏡，真係又飽又攰，雖然開講都有話呻飢莫呻飽，不過真係頂唔順要唞下消化下，因為萬松路呢一邊仲有夠香夠正嘅芝麻糊。萬松路就好短啫，行冇幾遠就到咗萬松園市場，嗰間果頂甜品磨出來嘅各種糊（唔記得問問老細有冇雞糊）非常受落，無論係芝麻糊定係健康五子糊，都係香夾稠。
•咁間鋪頭喺邊度？
果頂甜品：萬松路萬松園市場一樓。
前進路
萬松園市場旁邊就係前進路北段，喺萬國廣場到好又多前進店呢一段，每逢晏晝四點鐘左右就會有人喺一間平房同一幢大樓之間嘅縫隙前邊排隊，等一個賣糕點嘅檔囗仔開張。檔囗仔嘅主人每日朝早同屋企人一齊蒸好啲糕，晏晝就拉嚟呢度賣。啲糕蒸得靚，味道又好，受歡迎自然就正常過正常啦！排長隊都抵啦！不過，要返到屋企先至煎得嚟食，我就啱曬心水趁機唞下消化下，勁爆「大胃王」就凄涼啲，有得聞有得睇有得拎就係冇得食，鬼咬咁嘈話要即刻打的返屋企，搞到我哋個個嚡嚡聲。
咁間檔囗仔喺邊度？
唔知道呢檔叫乜名嘅檔囗仔：前進路一汽巴士汽修廠斜對面稔崗住宅樓之間。
同福路
喺前進路口沿住江南大道行一段就到咗市二宮同福路口，呢度係各級小食大胃王嘅樂園。第一個係芬芳甜品店，嗰啲糖不甩遠近聞名，煎餃同錦鹵雲吞（以前南園嘅錦鹵雲吞確係一絕）都係必點首選。再繼續向前行兩步，南村路口嘅粉麵店嘅秘制牛腩就最有名，就算食其他小食，都要叫老細加啲腩汁先至夠味。鋪頭仔一直都冇掛招牌，不過熟客仔都知道鋪頭仔叫做「瑞芳小食店」。跟住到咗以真材實料、夠濃夠味而被啲後生仔後生女追捧嘅安樂燉品店，呢度嘅燉品，品種唔同所以價格都唔同，不過盅盅足料盅盅真材實料。再向前行就到咗品味碗仔翅，冬菇絲、火腿絲同蛋花啲鮮美，加上胡椒啲香辣，天時冷食咗會暖身，天時熱食咗會發汗。行過紅會醫院，差唔多到寶崗大道，你會睇到寶基甜品店嘅招牌，鋪頭入邊都係用營養價值好高嘅水牛奶做成嘅甜品，奶香而不膩，心水推薦鳳凰奶糊同冰鎮雙皮奶。
•咁間鋪頭喺邊度？
芬芳甜品店：同福東路六百一十九號。
瑞芳小食店：同福東路南村路路口。
安樂燉品店：同福東路五百八十二號。
寶基甜品店：同福中路三百廿七號。
品味碗仔翅：同福中路四百四十八號。
眨下眼就係年初三。攞張機票睇下，係年初七香港直飛紐約，仲要執下行李同買番啲手信，今次行食街就係咁先。行咗咁多、睇咗咁多、食咗咁多，都應該係時候划番個終點嘞。
終點：乜食街指引都會有終點咩？未有來啦！之不過我條皮帶就好似到咗終點：喺廣州過一個春節，同嗰個勁爆「大胃王」係咁意行咗幾日食街，我嘅褲頭由卅三變成卅八，啲褲全部唔啱著，有排煩嘞！！！

回復 hr8888hr 26樓 的帖子

我剛剛和廣州聯絡了，你和世外MM都說得沒錯，「三如」樓以前的確是在河南，在海
珠橋腳，但現在已經搬去海珠路。

回復 Djogchen 25樓 的帖子

海珠路系河北，同福路系河南， 海珠路夾惠福西角落有間叫德心

回復 hr8888hr 24樓 的帖子

三如樓系系海珠路，而不是同福路，同福路個間唔記得咩名啦！

回復 Djogchen 18樓 的帖子

系唔系三如?

大概系市三宮前一個站(從芳村過黎)有間叫雲呑面世家嘅麵店, 果D鮮蝦雲呑面認真唔錯,呢度有冇人去食過?

坐看雲起時：  "國以民為主，民以食為天"。有志一同。

唔記得戴老花眼鏡，差的睇成有痔一通。

垂涎欲滴。。。

你唔記得起義路高第街口的「陽光冰室」的「五香狗肉煲」。

回復 坐看雲起時 17樓 的帖子

可以架!但係D輯毒犬圍住你氹氹轉.........睇你驚唔驚

仲請你入去坐下,傾下計仔.....

最後朱小蓀出黎話你D"一滴香"令D狗仔胃口大開,多謝你對警犬嘅貢獻

江南大道我都留底唔少腳印，因兄長住在那裡，市二宮同福路口有間茶樓，系個度飲
過幾次茶，不過唔記得間茶樓叫咩名？

......零八年,仲未發明出"一滴香".........所以你好彩,食唔到!
咁都得？你估帶唔帶得到入關呢？如果得，我屋企常哦扭計唔煲湯都吊我唔起啦！咪一樣有靚湯飲！！阿彌陀佛！！！

回復 格物便是致知 11樓 的帖子

"十滴水"就食得多，"一滴香"咁神奇嘅添加劑都係喺花旗睇報紙至知道。不過中國係咪間間鋪頭都用呢樣嘢，我睇就未必。我零八年喺廣州成個幾月，同啲親戚朋友四圍玩四圍搵食，除咗粵北地區落雪封路冇去之外，都行咗好多地方，仲冇聽過有啲咁神奇嘅古仔。我惗都係同"地溝油"咁，極少數無良嘅害群之馬先會用嚟呃神騙鬼啫，係咪？再加上呢度有啲新聞報導作大，搞到滿城風雨，好似中國人冇啲誠信咁。其實太陽照得到嘅地方都會有衰人，邊個國家都冇例外。

回復 格物便是致知 14樓 的帖子

有冇冧住買返樽返嚟自己慢慢嘆下咁呢。

回復 世外閑人 12樓 的帖子

未怕過,都唔知幾好味.........YummYYYYYY!!!!!!!!

民以食為天！甚合我意！亦合眾人之意！！～！

回復 格物便是致知 11樓 的帖子

咁你返去成日食，有冇怕怕先，哈哈！！！

回復 世外閑人 10樓 的帖子

只需一滴，清水就能變高湯。這種頗為神奇的食品添加劑名為「一滴香」。經分析，「一滴香」是通過化工合成，長期食用將危害人體健康。

聽講國內餐館間間用,碟碟菜都滴一滴!

回復 格物便是致知 9樓 的帖子

乜味架，你試過？

回復 世外閑人 8樓 的帖子

加點"一滴香"?