復我漢官威儀

復我漢官威儀
喺歷史傳統角度噏下恢復官轎制度真喺當務之急！
眾所周知，就算我哋中國目前嘅GDP仲未超越日本， GNP凈得日本仔嘅二份之一，不過我哋中國依家已經提前成為咗污染超級大國同埋腐敗超級大國。每年我哋中國嘅政府官員用阿爺嘅錢嚟定功食餸咁搞笑，加埋出國考察同公車私用上邊嘥嘅錢就已經超過咗九千億元人民幣（下同）。其中凈係公車私用呢一單嘥嘅錢就有成三千幾億咁多，而且仲係以每年百份之二十嘅速度增長。姑勿論呢種屎忽下嘅腐敗，每年嘥咗幾多稅金，凈係喺污染同埋二氧化碳排放呢一點嚟睇就十分犀利，十分之得人驚。
我哋中國啲公車究竟有幾多？睇嚟都冇乜人可以準確咁講出嚟。大大話話最保守嘅估計都有四百幾萬架以上，呢個仲係二零零四年嘅數據嚟咋。如果按照每年凈係遞增百份之二十嚟計數，依家都應該翻咗一番啦。呢個仲未曾包括警察同埋城管用嘅車，如果將呢啲都計埋，咁樣公用車至少有一千萬架至一千九百萬架左右。你諗下我哋中國依家啲汽車總數夾夾埋埋都不過得七千二百萬架左右，公車居然占咗百份之十三點八至百份之二十六點三，如果通通唔使用呢啲公車，咁樣每年汽車嘅二氧化碳排放量同埋尾氣排放量咪就可以減少百份之二十左右，買公車同埋汽油費都可以慳返唔少，小數怕長計，咁樣就可以有更多嘅錢畀啲政府官員用嚟出國考察同埋定功食餸喇。
之但係要箇啲官員佢哋出門自己行路或者係坐公交車梗唔係咁啱嘅，話曬佢哋都係領導緊又或者係引導緊我哋呢班蟻民，正式係我哋嘅米飯班主嚟。咁樣又點至做得到既廢咗除公車又唔使啲官員自己行路而搞到威風掃地，又可以實現雙贏呢？
嗰個答案就係：恢復番我哋中國自古以來就有嘅官轎制度。
根據我哋中國各個朝代嘅慣例，朝廷通過禮儀同埋制度詳細咁規定咗官轎使用嘅原則同埋方法，方便咗官吏嘅辦公，同時又維持咗官員嘅威儀同埋明確咗官員嘅等級區別。清朝規定，凡係三品嘅官員，喺京城出門「四人抬」出京「八人抬」，外省嘅督撫坐「八人抬」，督撫嘅部屬坐「四人抬」；三品以上嘅欽差大臣，坐「八人抬」等等。明朝嘅相爺張居正省親時所坐嘅大轎，是特製嘅大轎，要成卅二個轎夫抬扛。大轎嘅前邊係會客室，後邊嘅係卧室，外邊仲有走廊相通。兩個細路喺轎上邊隨時伺候，焚香搖扇。嗰種舒適嘅程度寶馬賓士點可以比得上。我諗如果胡錦濤又或者溫家寶出行係坐呢啲國產大轎，梗係比坐賓士同埋寶馬更加可以彰顯大國領袖嘅威儀喇！
我哋中國恢復官轎制度嘅好處多不勝舉，喺呢度凈係就下邊幾點重點說明。
一，根治公車腐敗，慳返大筆公車使費
冇咗公車，自然就冇咗公車腐敗。依家一架公車起碼都要成二十萬人仔以上，其實買成百幾萬人仔嘅公車嘅亦係大有人在。假如一架公車要四十幾萬，咁樣就可以請番個年收入二萬零嘅轎夫成二十年咁耐，咁仲未算汽車嘅燃油費，路橋費，維護費同埋司機費用。即係話如果將啲汽車換成倆個人抬嘅官轎，凈係買車嘅錢就足夠維持十年。依家啲汽車，一般用到十年八年都要換新嘅啦。另外我哋要明白坐公車啲官員嘅心理，佢哋之所以曳買好車絕對唔係為咗提高辦公效率，而係為咗榮耀，俗俗地講就係為咗耍下威風咋。照咁樣講起耍起威風嚟，仲有乜嘢比得上高高在上坐住八人抬嘅大轎，前面仲有人舉住「XX部長，寂靜迴避，禁止放屁」嘅牌子，敲鑼打鼓，一路行嚟更加威風凜凜，十足嘅架勢堂呢？
公車改官轎既滿足咗官員耍威風嘅心理，又慳返啲行政開支，真係可謂一石二鳥，利國利民咁話啦。
二，慳返啲汽車燃油消耗，減少尾氣排放
依家中國環境污染日益嚴重，聽我喺北京嘅朋友佢哋講已經成半年冇見過藍天白雲喇。成日都係暗無天日唔知日夜，簡直分唔清係晴天仲係陰天。嗰啲空氣質量聽講話已經係咁啱人類居住喇。搞到依家咁樣，汽車嘅尾氣污染自然係首當其衝。之但係隨住汽車擁有量嘅上升，污染只會係越嚟越嚴重。幾乎搵唔到解決問題嘅方法。照前面所講嘅，如果將啲公車改成官轎，咁樣就可以減少差唔多百份之二十嘅汽車擁有量。可以大大咁舒緩城市汽車堵塞同埋污染嘅現狀。官轎可以講係純綠色冇污染嘅交通工具，中國如果係引進咗官轎系統，咁樣就可以喺全世界樹立起節能減排嘅光輝形象，等啲G 8啞口無言無曬聲出，自愧不如，再唔敢對中國嘅嘢噏三噏四阿吱阿咗喇。真係可謂一石三鳥，利國利世咁話啦。
三，取之於民用之於民，帶動內需，解決咗大批下崗職工嘅就業問題
有關呢一點喺前面已經提到咗，公車改官轎，梗係要請番大批轎夫。按照一個王八倆人台，倆個王八四人抬嘅原理，每增加一個官員，至少就要解決倆個至四個人嘅就業問題。咁樣就可以解決大量嘅失業人口，極大咁舒緩社會嘅矛盾，構建出一個好漢三個幫，一個官員四人抬嘅和諧社會。好處仲唔止咁樣，引入官轎體系，仲可以極大咁推動我哋中國嘅官轎民轎產業嘅發展。咁樣比起以其嘥咗大筆外匯買進口高級轎車，改為買國產官轎民轎，真係好處多羅羅，可以拉動內需，形成咗一個新興嘅官轎民轎產業。咁樣一嚟就算啲官員喺買官轎嘅時候搞腐敗，都係肉爛仲係喺番嗰煲度，可以解決大批工人嘅就業問題。好處仲唔止得咁多，有咗官轎就必須有官道，我嘅設想係將城市啲人行道擴闊，平時人行，官員嚟咗畀官轎行，群眾跪侯喺馬路兩邊。咁樣興建官道又需要引進大批建設嘅項目，又可以創造出天文數字嘅GDP嚟。而且人行道擴闊咗，同時都方便咗老百姓嘅出行，真係可謂一石六鳥，利國利民咁話啦。
四，彰顯咗官員嘅威儀，提高咗政府官員喺人民群眾心目中嘅光輝形象。
唔使講官轎肯定係最能夠體現官員嘅威儀嘅最好法子。坐汽車即使你坐嘅係寶馬又好，勞斯萊斯也罷，梗會有啲人對眼生嚟襯鼻又或者係行路唔帶眼嘅，不過坐官轎就零舍唔同，倆人抬，定係四人抬，八人抬，官階地位一目了然。從今之後再冇對眼生嚟襯鼻又或者係行路唔帶眼嘅人將佢哋官老爺當做一般嘅群眾，仲要啲官員自己講出：「我係局長，我喺北京嚟嘅，你哋算個屁呀」咁樣得人敬畏令人心酸嘅感慨。另外官轎又可以有效咁防止腐敗，級別唔夠嘅官員，本來凈係坐得倆人抬之不過死頂去坐咗八人抬嘅，比本來凈係坐得大眾之不過死頂去坐咗賓士要容易畀人認出。另外，官轎亦對一啲中意表現親民嘅官員提供咗好好嘅舞台。嗰啲官員可以跟住頂官轎一齊行，一路問候跪喺路邊嘅百姓。如果啲官員係長期鍛煉，身體比較好嘅話，又可以上演一下官員抬轎夫嘅傳統橋段。咁樣比起依家啲大細官員都坐住寶馬一路絕塵呼嘯而過，要親民好多嘅。
五，方便上訪群眾攔路喊冤，幫人民群眾解決實際問題
另外，恢復有幾千年傳統嘅官轎制度，對弘揚我哋華夏傳統文化，復興中華文明都有非常之不可估量嘅意義。我哋中國自古以嚟，人民受咗冤屈都可以攔路叫冤枉嘅。呢一個傳統，唔凈止昭雪咗無數冤案，仲造就咗無數青天大老爺添。再睇依家看，冤民有冤無路訴，有苦無處申。告狀，連政府嘅大門都入唔到，就被保安踢番出嚟；上訪，又會畀駐京辦啲人抓打遣返，鎖入精神病院。咁樣搞簡直係太唔和諧喇。解決呢一個問題嘅根本方法，就是恢復官轎制度，畀老百姓以攔路喊冤嘅權利。
其實，恢復官轎制度仲有提高下層勞動人民嘅身體素質，養成老百姓怕官懼官嘅良好習慣等等，真係好處多多不一而足。總而言之，統而言之，恢復官轎制度，係振興我哋嘅民族文化，根治腐敗，改善環境，促進和諧，拉動內需，一石不知鬼咁多鳥嘅利國利民嘅治國良策。
希望中央高層可以儘快採納並且落實呢一套方案，咁樣徹底杜絕公車嘅腐敗。
評曰：
復我漢官威儀。圈閿。
...... 嗰啲官員可以跟住頂官轎一齊行，一路問候跪喺路邊嘅百姓。大笑！按照老廣用語，「被人問候」真係一件......，尤其是被佢哋啲「觀完」「問候」......再大笑！！刻畫狗官形象，入木三吋！！！