廟街夢幻曲 之二

阿彪呷咗啖奶茶，又繼續講落去：過咗冇耐，就有人安排我同亞玉，仲有其他三個人一齊上廣州。我哋喺一間招待所住落，日日冇嘢做，周街逛。幾年冇上去，省城轉曬樣。四圍都係大標語，個個人睇落都好精神。過咗幾日，接到通知話過兩日要開歡迎會，叫我哋准備下。
亞玉問我要准備啲乜嘢？我同佢講笑咁話「准備擦一餐啩。」
亞玉叫我正經啲，我話我都唔知乜頭乜路，不如問下嗰位嚟發通知嘅同志仲好啦。
嗰位同志聽到，就笑笑口咁同我哋講：「係咁嘅，到時會有領導接見你哋。如果領導問你哋點解返上嚟，你會點講呢？」
我就話：「咁咪有碗話碗，有碟話碟。話香港冇得撈，返上嚟搵食囉。」
個同志話：「如果你話一心返祖國參加建設會唔會好聽啲呢？」
我就應佢啦：「梗係好聽好多啦。一於就照你咁噏啦。」
開會嗰日就真墟冚啦，成個禮堂坐滿曬人。啲領導輪流發言之後仲有個香港人代表發言，跟住就聚餐。
我就同亞玉哋講笑：「嗱，係咪有餐食啊？」
佢哋幾個齊齊棟起只手指公話：「至叻就呢勻啦，彪哥。」

開會之後嗰幾日，就安排我哋呢班人四圍參觀。相處咗幾日至知原來返上省城嘅有好多猛人。除咗戲行一啲大老倌，仲有教育家，畫家之類。好似我咁嘅，直頭就係「梅香」一個，仲係唔使開口嗰只。好采嗰陣時啲人幾平等，人人都係同志，冇乜大細超。又過得一排，就「分配」啦，各人按照原來嘅行當分到唔同嘅單位。我同亞玉就分咗去粵劇團。話時話，雖然初頭唔係幾習慣上便周不時開會，但係嗰陣時上便啲人普遍有一種奮發向上嘅精神係我哋冇嘅。整整下我哋都融入咗嗰種氣氛之中，覺得自己係社會發展嘅一分子，做緊一件好有意義嘅事。唔同舊陣時咁，唱戲淨係為搵食。我哋嗰陣時排戲好落力，既有傳統劇目，又有新戲。又唔使擔心票房，個個月實有糧出。有時落鄉演出，啲鄉親都唔知幾熱情，大魚大肉唔在講，仲送埋啲土特產畀我哋拎返省城。

亞玉喺劇團一直都係二邦花旦，佢份人做事認真，又唔撩事斗非，所以人緣好好。嗰陣時落香港都算利便，尤其係香港返上嚟嘅，只要係冇演出任務，寫份申請通常都會批准。咁亞玉咪時不時返落香港探親囉。佢又都周時託人打聽省城有冇啱阿生嘅工作，好想阿生返埋上嚟做嘢，一家團聚。其實當時好多單位都想要阿生，但係都冇法子安置佢三仔乸。要佢哋三仔乸分三笪佢哋梗唔制啦，咁件事就一路拖住。點知后來亞玉出咗事，成頭家仲散曬添。。。。。。

聽到呢度，林伯長嘆一聲：「嚡！真係一子錯，滿盤皆落索咯。」

阿彪望咗林伯一眼，擰下個頭，繼續開聲講啦：有一次，我哋個團排咗齣新戲。上戲之前照例要請啲大粒佬嚟審查。約定日子班大粒佬就嚟到我哋團，總共四個人。有三個之前都見過下，另外一個至後生嘅就未見過。團長事先就話咗過我哋知，今勻嚟審查嘅會有個新嚟嘅高部長，叫我哋醒定啲，千祈咪甩底。大家都諗唔到個新部長咁後生，大家打醒十二分精神，唱完咗齣戲。班大粒佬冇乜意見，成棚人鬆咗口氣。高部長仲特登叫團長招呼亞玉同我行埋佢哋班人度，首先表示歡迎我哋返回祖國參加建設，跟住又問我哋係唔係黨員。得知我哋唔係黨員嘅時候，高部長就同我哋講唔好不問政治，要做個「又紅又專」嘅演員。我同亞玉一味話「哦！」

過得幾日，啲團領導鬼咁開心宣佈話高部長揀咗我哋團做佢嘅「蹲點單位」。我唔明點解佢哋會咁高興，唔通唔使做咩？有個老團員就解釋我知：凡係「蹲點單位」即係某個領導嘅「私伙嘢」，一定有著數。你諗下啦，佢揀得邊個單位梗係望呢個單位有成績。點至有成績呢？梗係要喂啲好料啦。正所謂「近廚得食，近官得力」，咁你話班頭點會唔開心到咀都歪呢？

為咗方便高部長喺我哋團指導工作，團領導褪咗一間辦公室畀佢專用。從始以後，高部長就時不時嚟我哋團，嚟親就搵人談話。搵得最多嘅就係亞玉。於是就有傳言話高部長要培養亞玉入黨同埋提拔做幹部。亞玉就一味話唔係。傳咗一排慢慢就淡咗。

又過得幾個月，我哋團要去粵北幾笪地方演出，高部長親自帶團。演出一路都好順利，高部長亦都好似喺省城咁成日搵人談話，做思想工作。有一晚冇演出，高部長又使人叫亞玉入咗佢間房談話。嗰次去嘅地方條件幾好，當地嘅幹部安排咗個套間畀高部長，離開我哋團員住嘅宿舍較為遠啲。嗰晚亞玉去咗好耐都未返宿舍。我哋掛住傾偈，打撲克亦都冇為意。點知亞玉忽然之間揞住塊面，喊住咁走返宿舍。啲同事問佢，佢粒聲唔出，一味喊。冇幾耐，兩個團長入宿舍叫咗亞玉出去，一路傾到半夜，大家都瞓咗亞玉至返番宿舍。啲女同事知道梗有事發生咗，不過大家都唔想多事。第二日我問亞玉前一晚發生咗乜嘢事，亞玉話遲下會話我知，叫我唔好問咁多。

嗰晚之後，成團人都好似失咗魂。高部長第二朝話省城有事，提前走咗。兩個團長日日面燶燶，嬲咗成村人咁，亞玉就成個人落曬型。終於捱到演出任務完成，返到省城，我連除追問亞玉嗰晚究竟發生乜嘢事。亞玉起先都唔想講，后來見我發曬火至吞吞吐吐咁話我知。原來嗰只狗公一向借頭借路話搵佢談思想，其實一直想坤亞玉做佢嘅情人。又話要搵團長做亞玉嘅入黨介紹人，又話要調亞玉去第二個團做正印。亞玉唔敢得失佢，就一直詐傻扮懵。嗰晚喺鄉下，只狗公開明車馬想霸王硬上弓。點知亞玉不甘受辱，一嘢搲損咗佢塊面，佢就打咗亞玉一巴。事後團長就同亞玉講個高部長好有來頭，年紀唔大但係資格就好老。既然自己又冇乜蝕底，不如就當粉筆字抹咗去，唔好搞大件事。咁亞玉咪唯有暗啞抵囉。我聽咗條氣好唔順。但係回心一諗，團長都開到聲咯，即係怕咗佢至怕米貴啦，唔通真係去搵個包青天嚟主持公道咩？亞玉仲叫我千祈唔好話畀阿生知，怕佢忍唔住頸做出啲傻事咁話喎。咁我咪唯有詐唔知囉。

又過咗幾個月，出咗份通告話要分批調人落基層加強地方嘅文藝力量，亞玉屬第一批，仲係要去粵北山區嘅一個縣。亞玉想話落基層之前返香港一次，團領導就話時間比較趕，三日後就要走，唔批。有人聽到啲領導話其實係擔心亞玉落咗香港就唔再返嚟。咁亞玉就唯有含住泡眼淚去粵北啦。

阿生得知亞玉落鄉，有排都唔落得香港，就特登帶埋文仔去探亞玉。經過省城返香港嘅時候同我講起，亞玉去嘅嗰個縣，落咗火車仲要坐成七，八個鍾車至到。個縣好細又好窮，亞玉喺嗰處做嘅嘢同唱戲全不相干，亞玉唔知捱得幾耐。我就安慰佢話，上頭話明係分批，希望遲下就有得調返省城啦。阿生就話早知係咁就打死都唔畀亞玉嚟省城。我唯有勸佢見步行步啦。

亞玉係年頭落鄉嘅，臨近年尾，忽然接到粵北嗰邊嘅消息話亞玉死咗。大家都好愕然。據縣文化站嘅講法，亞玉係跌咗落個塘浸死嘅。團領導即刻通知阿生，阿生隔咗幾日就趕返省城。想話向團領導了解下情況，團領導就話佢哋都唔係咁清楚，叫阿生到當地去問。

阿生匆匆忙忙趕去縣，點知都見唔到亞玉條屍。文化站個站長話估計亞玉係夜晚跌咗落個塘，第二日朝早至被人發現，浸到腫曬，唔躉得，所以已經燒咗。阿生想話住多幾日，搵多啲人了解下情況。個站長就話公安局已經有咗結論，而加挨年近晚，冇人得閑招呼佢，叫佢攞咗啲骨灰嗱嗱聲走。阿生唔理佢，係都要住多幾日。點知問親亞玉單嘢，個個都灑手擰頭話唔知。招待所看門口個阿伯見阿生咁凄涼，有一晚靜雞雞入到阿生間房，將佢所聽返嚟嘅所有嘢話曬阿生知。阿伯話，約莫三個月前，文化站收到消息，亞玉有外逃香港嘅傾向，要求文化站加以注意，亞玉有乜依郁要即刻報告。文化站啲領導留意咗一排，見亞玉冇乜異常，就將件事丟埋一邊。點知上個月，縣委要文化站盡快組織一場批鬥會，批判亞玉「抗拒思想改造，意圖投敵叛國」。文化站長一頭霧水，又唔敢問咁多。批鬥會嗰晚，縣委專門派咗十幾個人嚟參加。話時話，如果冇呢班人，文化站嗰幾丁友都唔知噏乜好。一開會就要亞玉批判自己嘅資產階級思想。亞玉唔知噏乜好，係都唔開聲。班人就一個個發言，呢個話亞玉成日搽脂蕩粉，資產階級思想嚴重，嗰個就話亞玉落鄉咁耐都好少落田，抗拒勞動。。。。。。最犀利嗰下係有條友攞咗張紙出嚟，話係亞玉一心想落香港，意圖投敵叛國嘅罪証！亞玉一見到張紙，塊面即刻白曬。佢認得出係一封佢寫畀阿生嘅信，裡面有講到自己好後悔，一心諗住上省城有多啲機會唱戲，點知而加半天吊，都唔知點算！但係亞玉又好硬頸，死都唔肯認錯。縣委班友冇曬符，唯有將亞玉扯落各條鄉「遊鬥」。亞玉出事前一晚，又俾縣委班友拖落鄉開批鬥會，點知第二朝就發現亞玉死咗係口塘裡面。

阿生當堂就要去搵縣委領導評理。阿伯就勸佢話手瓜始終拗唔過大髀嘅，無謂搞到自己返唔到香港啦。阿伯仲話，出事之後，關於將亞玉嘅死定為「意外死亡」抑或「畏罪自殺」都有爭議。阿生話人都死咗咯，點定都係死咗啦，有乜分別啫？阿伯話你哋香港人唔明咖啦。「意外死亡」就算人民內部矛盾，如果係「畏罪自殺」就係敵我矛盾，你想攞返盒骨灰都怕仲有好多手尾你跟。阿生多謝阿伯指點，第二朝就撘車走，從此再冇踏入過大陸一步。

阿彪講到呢度，大眾聽到有抽泣咁聲，跟聲望去，見到蘇師奶用手巾仔揞住口，喺檯面擺低啲錢，推開張椅，急急腳咁行咗出去。超老班望住蘇師奶嘅背影，細細聲咁話：「嚡！又係一個癡情女子。」

待續......