曲解《基本法》無非混淆視聽，構陷「兩辦」只因自身難保

近日，香港本地又爆出多條熱點新聞，而反對派無一例外喺其中扮演咗唔光彩嘅主角——先係郭榮鏗濫權癱瘓內會綁架全港市民利益導致大量市民及團體抗議，後有警方雷霆出擊一舉拘捕十幾名反對派亂港分子。身為一個飽受社會動盪之苦嘅普通市民，筆者真心希望「大亂之後有大治」。相信今次警方出手係一個良好嘅開端，助香港重回正軌再現活力。
但係就喺反對派失道寡助廣失人心，全港市民開始睇到止暴制亂曙光嘅時候，卻仲有一啲聲音負隅頑抗，心有不甘咁攪攪陣——針對「兩辦」發言人日前譴責郭榮鏗癱瘓立法會內委會嘅聲明，反對派竟然反咬一口稱「兩辦」無權「干預」立法會運作；唔少「黃媒」更為郭榮鏗嘅拉布嘅行為粉飾，稱「並冇違背議事規則」；而以路透社為代表嘅一啲西方媒體近日亦發表聲明稱「有唔願透露姓名嘅法官表示香港嘅司法系統面臨日益嚴重嘅壓迫。」聯想到冇幾耐前郭榮鏗、莫乃光為代表嘅反對派議員赴美乞求美國干預香港事務，勾連西方一啲所謂「人權組織」對香港指手畫腳，果然哩啲反對派嘅外國老闆真嘅「有求必應」。
然而謊話講一千遍亦唔可能變成事實。先睇下反對派針對「兩辦」譴責嘅說辭。反對派稱「兩辦」無權「干預」立法會運作，理由係違反咗基本法第二十二條。講出哩種言論，顯然根本唔懂「一國兩制」，亦唔懂基本法。中央對香港實行「一國兩制」、「港人治港」、高度自治嘅方針，唔等於香港就係完全自治。特區享有嘅自治權都源於中央授權，國務院港澳辦和香港中聯辦係中央授權專責處理香港事務嘅機構，並唔係基本法第二十二條所指一般意義上嘅「中央人民政府所屬各部門」，其自身職責就係推動「一國兩制」喺香港貫徹落實，因此當然有權代表中央政府行使監督權並表明嚴正態度，其正當性、合法性毋庸置疑。如此淺顯嘅道理卻被一啲反對派喉舌本末倒置反過來指責「兩辦」，唔單止係對基本法嘅故意曲解，更係對市民嘅一種惡意誤導。至於郭榮鏗嘅刻意濫權，亦唔存在「冇違背議事規則」嘅講法。郭氏嘅行為早已違背佢就職時關於擁護基本法、效忠香港特區嘅誓言，更可能涉嫌觸犯公職人員行為失當罪。黃媒哩個時候再出來「洗地」，只能講係死鴨仔嘴硬。而針對路透社「香港司法受嚴重壓迫」嘅報導，前幾日終審法院首席法官馬道立已發表聲明，指由2010年佢擔任終院首席法官以來，從未喺任何時間遇到或感受到內地機關嘅干預，司法獨立受基本法保障係香港法治嘅重要一環，首席法官哩個聲明無疑狠狠咁打咗西媒一把掌。
何為「干預」？中央對內委會癱瘓表態發聲係理所當然，而反對派議員要求外國政府制裁香港，咁先係赤裸裸嘅干預！香港近期一系列正本清源嘅法治措施，都令反對派聞到咗一啲大難臨頭嘅味道，哩個時候再出動輿論工具混淆視聽，恐怕只能係螳臂當車！