三問中大段崇智校長

18日,香港中文大學校長段崇智發公開信促請特首嚴正跟進「學生在拘留期間遭警方不合理對待」,又指「對於部分警務人員涉嫌不當使用暴力或違反人權,經查證後須予以譴責」。段校長此舉令人十分費解,學生有冤屈必須還原真相處理,但捏造事實抹黑警方嘅行為亦應制止!身為校長嘅段崇智偏信學生一面之辭,未經查實就發公開信指責警方,呢個係校長應做嘅事咩?喺呢度我想問段校長幾個問題。

一問段校長,你可知大學嘅首要責任係乜?唔通唔係教育學生學知識、明事理,做一個堂堂正正嘅人咩?一個求學嘅地方,有30幾個學生違法被捕,身為校長,冇反省點解會教出咁多暴徒,冇追究學生到底做咗乜違法事,一聽到學生哭訴「警察打我」就攬著佢哋一起抱頭痛哭,然後拍曬心口許諾:如警察涉使用暴力或違反人權,查證後必須譴責。敢問校長,如果查無其事,你會帶著誣告嘅學生到警察面前道歉咩?點解你對已證實嘅學生暴力視若無睹,卻對未證實嘅警察暴力張牙舞爪?

二問段校長,你可知學生嘅主要任務係乜?學生嘅主要任務應該係學習,而吾係過度、過早參與政治運動。尊師重道係學生最基本嘅品質要求,而你嘅學生喺與你對話之際屢爆粗口,甚至稱呼你為「段狗」，令你斯文掃地。你喺一周後發出呢封公開信，譴責警務人員不當暴力。我祗想問問段校長,你有冇喺「瞭解被捕後遇到嘅種種情況」嘅同時,順便瞭解一下呢啲學生喺被捕前嘅行為:佢哋有冇掟磚?有冇放火?有冇掟汽油彈?有冇破壞地鐵站?有冇襲擊警察?有冇毀壞商店財物?有冇煽惑他人? 好明顯你嘅學生唔單祗唔識得尊重師長,更加崇尚暴力,而你僅僅聽取學生一面之詞就選擇同佢哋企喺一齊,係唔係意味著選擇和暴力企喺一齊?

三問段校長,你可知中大校訓「博文約禮」嘅涵義?幾個月以嚟嘅「反修例」運動,校園政治化已經達到令人髮指嘅程度,學生成為街頭運動嘅主力軍。眾多學生參與罷課、遊行示威,近日中大驚現穿黑衣戴面罩公然在校園內奏《願榮光歸香港》、「升黑旗」,呢個就係當今中大人光大校訓嘅作為咩?罷課曠學,何以博文?辱師淩寡,何以約禮?難怪中大校友會痛斥貴校「為人師表見到不公不義, 豈能噤若寒蟬?甚至宜誡翻獎,應訶反笑」！段校長此番單憑學生片面之詞對警方處事手法妄下判斷,又點符合「博文約禮」之校訓?

聽講段校長係一位生物學家,以67歲高齡放棄美國優厚待遇返到中大任校長,當時曾言「有原則最重要,見風使舵?NO！唔係我風格」希望段校長能夠堅守士人風骨,唔好「見風使舵」，更唔好輕易向惡勢力低頭。