張曉明的古惑仔體制給香港添亂

   ■中聯辦主任張曉明（左）日前表示特首地位高於行政、立法、司法三權，惹來輿論嘩然。資料圖片
   
    張曉明所謂特首地位超然，在中央之下，高於三權之說法，乃習近平三權合作論的進化版。三權合作團結在特首身邊，追源溯始，應是英治港督憲制地位的華強北山寨版。港督向英國執政內閣負責，超然於殖民地三權。三權合作的美好時代是八十年代OMELCO system兩局體制，行政立法重疊，問題是香港未脫離殖民地時，已逐步走向民主化，九一直選後行政立法分家，互相制衡，九七后特首及三權分工亦清楚寫入《基本法》，你叫做三權合作也好、或三權分立也好，都只不過屬口水嘢。
   
    強世功、張曉明等人如果有睇《古惑仔》電影系列，事情就簡單得多，唔會搞到一塌糊塗。用古惑仔對白演繹張曉明口中所謂「特首地位超然體制」，應作如下表述：「袋巾、卿姐、鈺成、道立、林鄭，你班人同我聽清楚，銅鑼灣呢個地頭，系蔣生交畀浩南做揸fit人，渠代表阿公去管，總之凡系社團吹雞要浩南幫拖，大家識做就唔好阿支阿左，要一條心撐渠，撐渠即系撐阿公，識做慨話其他馬檻、泊車仔、老翻同桑拿，就畀番大家自己管。」香港人當堂明曬，唔會大嗌：「好亂呀！」
   
    但渠哋要扮理性，扮講法治，於是就用一套法律語言去包裝「古惑仔體制」，結果搞到風波不絕。去年先搞出一份國務院白皮書，又搞一個8.31決定，香港輿論嘩然，為佔中推波助瀾。今次有關行政長官有獨立政治角色，其實根本冇乜爭議，其權力也寫在《基本法》，如何受立法會制衡，也一清二楚，一睇就知。特首能否成為三權核心，問題根本唔關乎其法律地位，而在於其政治操作過程、能力及民意支持。張曉明指特首雙重問責，既向中央負責，又向特區負責，真正意思系當特首執行中央指示時，三權應合作支持，渠又怕講得太白太露骨，所以變成亂噏。
   
    要確立特首核心地位，先要處理好政治權力運作，即政治體制問題，港人治港表現令人失望，在於體制不合理。首先行政立法冇建立合作機制，衛奕信、彭定康何嘗唔頭痛，政府在議會內冇票，因為缺咗政黨作中介，西敏寺模式由多數黨組閣執政，確保行政機關提案在議會得到支持；美式總統制，總統權力來源獨立於議會選舉，有直接民意授權，即使議會內反對派佔多數，都可直接訴諸民意，壓制議會。
   
    政治體制三不像
   
    《基本法》下政治體制三不像才是一切問題根源，既非議會多數黨領袖當特首，又非美式總統內閣制，體制不完善，只有靠人治及潛規則運作。其實用「古惑仔體制」，靠大家「識做」來操作，本來暫時解決到問題，但呢個體制要有效，只能做不能講，一見光就死。而最重要系中央都要「識做」，畀特首有政治空間，唔能夠將渠變成「Yes man」，被港人視為中央或西環「凡是派」政治傀儡。正因為雙重問責，先要「好女兩頭瞞」，特首在特區冇民意支持，試問何來足夠政治能量執行中央交託的任務呢？越被人認為一切靠中央，特首地位就越低，出嚟行邊有人畀面渠本人，何來超然地位。浩南做到銅鑼灣揸fit人，唔可以單靠蔣天生支持，仲有一班「洪興仔」出生入死及區內陀地幫手。
   
    經歷梁振英三年零八個月管治，莫非北京仲唔明白行政主導並非靠空洞條文，要系靠體制內慨人。當制度未完備，人慨因素最重要。一個凡事依靠共產黨，冇能力爭取建制力量及民意支持，動員本地政治力量落實爭議施政慨特首，只會不斷削弱特首政治地位，人見人藐，仲想叫佢做超然至尊特首？不如叫魯芬去選港姐吖笨！