廟街夢幻曲 之八

香港奉行自由經濟，政府一向採取「積極不干預」嘅管理方式。除咗少數公營事業，所有商業活動都喺自主經營,自負盈虧。廟街嘅商戶同售貨攤點亦不例外，各個攤點各自為政，難免有些少雜亂。就攞賣書籍嚟講，無論係新嘅出版物或者舊書買賣，商販基本上根據市場需求入貨，其他因素都唔會太在意。故此，《毛主席詩詞三十七首》同《歷代春宮圖》擺埋喺同一個檔口度售賣嘅現象毫不足怪。即如有啲書店嘅書架上亦可能同時陳列馬克思嘅《資本論》同希特勒嘅《我的奮鬥》。由於傳統「成行成市」嘅觀念，同類型嘅攤檔大多數聚埋一起，所賣嘅貨物亦都大同小異。經過長時間嘅協調互動，各個攤點之間亦都會遵循一啲約定俗成嘅規則。譬如明火煮食嘅熟食檔就唔會同賣衫褲啲檔口撈埋一起。

占卦算命嘅檔口大多數集中喺「天後廟」側邊嘅「街市街」，面向「九龍政府合署」。喺呢度，有卜者用雀仔替人占吉凶，有相士用銅錢為人卜前程；有人喺地面鋪一張大大嘅人面畫圖，有人喺圍欄上掛住各種各樣嘅圖籙；有人自稱係「鬼谷子」傳人，有人話自己習嘅係「河圖洛書」...個別有現代營銷意識嘅相士重會掛番張自己同名人嘅合照做生招牌。不論佢哋使嘅係乜嘢路數，打嘅係乜嘢旗號，呢啲檔口有一個共同特點：佢哋唔似得其它賣嘢嘅檔口咁使用大瓦數嘅電燈。佢哋嘅檔口永遠係一隻火數好低嘅燈膽仔甚至係一盞火水燈。有人話，佢哋咁樣做唔係為咗慳皮咁簡單而係另有深意嘅。諗落又係嘅，火水燈上下跳動，左右飄忽嘅火苗映下映下，咁樣探究未來確實加多幾分神秘感。由於唔夠光，相士同人睇掌嘅時候往往就要用電筒嚟查個客啲掌紋，因此產生咗「照田雞」呢句隱語。

「照田雞」呢個詞喺粵語裡面有唔同嘅解釋。田雞有一個特性，被強光正照雙眼嘅時候佢哋會企定定，任捉唔嬲。廣府人鍾意田雞味美，住喺鄉村嘅人就利用佢哋呢個弱點，夜晚黑帶支強光電筒去田基地頭捉田雞。「照田雞」呢個詞嘅本意就喺咁嚟嘅。後來，有啲百厭星帶支電筒去角落頭照啲拖友，嚇佢哋一跳，亦叫做「照田雞」。至於將戲院帶位同睇手相亦稱之為「照田雞」就係呢個詞嘅引申之義啦。

「天後廟」前邊嘅空地上有好多棵大榕樹。出於對環境衛生嘅考慮，市政府將呢塊空地鋪咗水泥，凈係喺每棵樹桿嘅周圍保留些少泥地空間，不致於影響樹木嘅生長。鋪咗水泥啲榕樹嘅氣根就冇法子無限制咁生長，但係枝繁葉茂嘅樹冠仍然會喺上面相互交纏。有幾位靠講古仔搵食嘅「講古佬」就各自佔據一棵樹頭展示佢哋嘅才華。呢啲「講古佬」有人擅長講歷史說部，譬如《薛剛反唐》，《五鼠鬧東京》。有人鍾意講《火燒紅蓮寺》，《鬼腳七三打扯旗山》。亦有人會將近代嘅事件作成古仔來講。譬如發生喺 50 年代尾，60 年代初嘅《三狼案》由於案件發生嘅時間跨度大 （1959 年 6 月至 1961 年 2 月），案件事實聳人聽聞（牽涉到黃姓富商父子分別俾人綁架，走甩，死亡呢啲情節），隔咗好多年都重有人講。

「有嘢唱」係廟街嘅另外一樣特色。街坊同市民行街買嘢之餘，有興趣嘅可以停低欣賞唔同樂隊嘅演出。佢哋幾個人一組，分散喺「天後廟」附近，吹拉彈唱，互不干擾。呢啲「曲藝團」嘅表演十足十反映出香港兼收並蓄嘅特點。佢哋有啲演唱「時代曲」，有人唱粵曲，有啲唱「歐西流行曲」，間唔中亦有人會唱「革命歌曲」。喺呢度，你會聽到一丁一板，工尺合士上嘅粵曲唱段，亦會聽到爵士鼓，吉他伴奏嘅「披頭四」名曲；左邊傳來「妹妹，我愛你，我愛你呀，我愛你」，右邊或者係「五星紅旗迎風飄揚」......當其時，除咗由大陸或者台灣過嚟嘅人，香港市民多數對「國語」或者「普通話」唔熟悉。佢哋基本上通過台灣電影同埋被稱為「時代曲」嘅台灣流行曲認識「國語」。呢啲「曲藝團」演唱嘅曲目各有側重亦都各有「擁躉」。由於唱嘢係冇賣票嘅，「曲藝團」演出嘅時候就會派啲姑娘仔捧住個托盤或者窩籃，上面放啲香口膠，話梅，魚皮花生之類細細包嘅零食向圍觀啲聽眾兜售。呢啲嘢食可能貴過鋪頭賣嘅些小，多數聽眾都唔不太介意，畢竟唔想被呢啲姑娘仔睇小自己係「孤寒種」。當然亦都有啲「鐵公雞」，見到姑娘仔走過來就行過另一邊甚至行開，但係呢種人畢竟係少數。有啲街坊亦鐘意「捧角」，對於啱心水嘅演員，佢哋會特別出錢「點唱」。接到「點唱」單嘅演員自然要向點唱者致謝，點唱者喺街坊欽羨嘅目光中或者好得戚，或者表面若無其事，暗暗開心，亦都算得係人生百態。

阿文嘅舅公同幾個同道中人聚埋一起切磋粵曲技藝，原本無意藉此嚟搵錢。事緣有一個喺廟街唱咗好多年嘅組合，由於內部矛盾冇法子調和，就嚟散檔，有人就提議由阿文個舅公牽頭組成一個演出小組，填補呢個空缺。舅公經營咗一世戲班，搞咁樣一個小團體自然係駕輕就熟。但係舅公認為，而家嘅班底除咗阿文之外，其餘嘅人都有番咁上下年紀，冇辦法適應一個禮拜七晚嘅演出。故此要搵到一兩個後生啲，重要鎮得住場嘅人來加盟，呢件事做起來至有把握。眾人聽咗舅公嘅分析都覺得有道理。於是各自動用自己嘅人脈資源物色人選。由於佢哋呢棚人過往都係撈戲行或者喺相關行業搵食，門生故舊，同業好友都唔少， 好快就搵到合適嘅人選。經過一段時間籌備，呢個《同樂社》就正式係廟街演出。

《同樂社》嘅台柱係一生兩旦。嗰個「生」戲路好廣，生，末，凈，醜樣樣皆能，同另外兩個旦角搭配，唱得出嘅曲目就好多啦。加埋《同樂社》原班人馬合作純熟嘅樂器演奏，《同樂社》呢個新組合好快就喺廟街企穩腳。

《同樂社》其中一位旦角妙霞好有觀眾緣，短時間就有唔少「擁躉」。凡係妙霞演出，觀眾嘅反應都好熱烈，而且重有觀眾點唱。呢個妙霞係戲行裡面嘅紅褲子出身，喺戲班度捱咗好多年先至做到「開口梅香」，只不過唱咗冇耐就離開咗舞台。妙霞離開粵劇舞台係因為一個男人，一個世居澳門嘅男人。

妙霞喺舞台上嘅演出雖然得嗰幾句台詞，但係行內人一致認為佢嘅基本功紮實，聲底清脆響亮，假以時日必能成大器。對於妙霞匆匆離開舞台，啲前輩都戥佢惋惜，不過佢身邊幾嗰小姐妹就戥佢慶幸遇到榮少咁樣一個有情郎。對於男女之間相遇相戀，民間素來有「緣分」嘅講法。榮少同妙霞由相識到定情皆因一個偶然嘅機會，如果冇呢次偶然嘅相遇，妙霞嘅人生舞台上演出嘅必定係另一樣劇情。

榮少嗰伯爺係澳門一間大醬園嘅老闆，佢個醬園出品嘅蚝油，蝦醬，辣椒醬暢銷港澳星馬。榮少個老母係佢伯爺個三姨太，係土生葡人，祖籍葡萄牙，所以榮少嘅外貌有啲「鬼鬼哋」，加埋佢曾經喺葡萄牙讀咗幾年大學，舉手投足不免有些少西人嘅派頭。不過又怪噃，佢呢個「半唐番」竟然對粵劇好有興趣，唔凈止識得欣賞，重唱得幾咀添，而且唱得中規中舉，成為澳門街上嘅佳話。有同榮少一家相熟嘅人口中傳出咗個中因由，啲人至恍然大悟。榮少個伯爺同原配夫人都係粵劇迷，榮少滿月嘅時候，佢伯爺就請咗當時一個好有名嘅戲班出堂會，喺屋企大宴親朋。當奶媽抱住啱啱滿月嘅榮少出嚟亮相嘅時候，驚住滿堂賓客嘈嘈吵吵加埋台上大鑼大鼓嚇親個少爺仔，緊張到不得了。點不知呢個被人包到隻粽咁嘅榮少，個頭仔唔郁得啫，對眼仔碌碌就兩頭望，引到周圍嘅人一陣陣驚嘆。

榮少三歲嘅時候，佢個老母出車禍死咗。佢伯爺個二姨太，即係榮少個二娘就孭起照顧，督導榮少嘅責任。二娘自己冇生落一男半女，自細就疼惜榮少，而家榮少嘅生母唔在生，二娘對榮少就更加多幾錢肉緊。二娘原先係梨園中人，嫁咗榮少個伯爺之後就唔再登台，只不過偶然間客串下。每逢省港大老倌登台唱戲，榮少個伯爺都會帶住大娘，二娘去捧場，有時又會埋帶榮少一齊去。榮少初頭純粹係「屙屎貪高興」，對曲詞曲調毫無認識，難得嘅係佢喺劇場唔會嫌悶嫌冇癮。其實佢伯爺心中有數嘅，但凡大段文唱嘅戲碼就唔會帶榮少去睇，故此榮少初時睇嘅大戲多數都係 《五郎救弟》，《沙陀班兵》之類武生戲。到佢大個啲，睇戲，聽戲嘅範圍就廣啦，睇唔明，聽唔明白嘅地方，可以請教二娘，榮少對粵劇的興趣就一直都維持住。講到喺葡萄牙讀大學嗰幾年，榮少話最唔慣就係冇「大戲」睇。

榮少大學畢業之後就返到澳門，係佢伯爺間醬園度做嘢，協助處理香港嘅業務。港澳兩地雖然相距唔係好遠，當時唯有搭船一條路，來回一趟都要唔少時間。故此榮少次次都會喺香港住返幾日。逗留期間，商場上嘅飲宴應酬自然唔少。依照商界不成文嘅規矩，食晏只不過係便飯，正式嘅宴請必定安排喺夜晚。最隆重嘅係晚飯之後重有「餘慶節目」，亦即係俗稱嘅「晚飯直落」。「直落」要落到乜嘢時候並冇一定嘅標準，視乎交情深淺而定。榮少初初介入香港業務嘅時候，啲客唔知道榮少嘅喜好，按常規晚宴結束就陪住榮少到當時最大嘅舞廳去消遣。舞廳裡面嘅「大班」見幾個相熟嘅老闆眾星拱月咁陪住嗰英俊少年，知道榮少係當晚嘅主角，格外醒神，不停咁帶住旗下嘅舞女嚟坐台。舞廳啲小姐閱人無數，只要來到呢張檯坐台，無不使出渾身解數，希望能夠留低深刻印象俾呢位少爺。榮少來者不拒，同每位小姐都跳咗隻舞。榮少身材高大，舞藝嫻熟，跳起舞嚟瀟灑自如，風度翩翩。又唔似得一啲舞客咁，特登要索小姐油，更加之令到啲小姐芳心暗許，轉檯嘅時候一個個都依依不捨咁樣。食宵夜嘅時候，啲客贊榮少舞跳得好，是必係濠江花國常客。不料榮少對佢哋話，交際舞係讀書嗰時學嘅，自己平時凈係喺舞會度跳，舞廳就從來都唔去，亦請各位以後唔使安排呢類活動。後來有人得知榮少鍾意睇「大戲」，碰啱有出名嘅大老倌有好戲碼就請榮少去睇，榮少就從來都冇托手踭。榮少同妙霞嘅姻緣就係通過一場戲而起咗頭。