廟街夢幻曲 之六

阿文同阿樂，二叔仲有阿嫦講聲拜拜之後，就行過咗對面街。佢望見前面有一個熟悉嘅身影，連除加快腳步追上去。行埋一睇，正係蘇師奶。阿文打咗個招呼：「姑姐！」
蘇師奶擰返頭一望：「哦！係阿文。放工啦？」
阿文話：「係呀，放咗工一陣咯，正話同街坊傾咗幾句。」
阿文見姑姐面帶愁容，兼且眼溼溼咁，忍唔住問咗句：「姑姐妳見點呀？」
蘇師奶下意識咁用手巾仔輕輕揩咗下眼角話：「冇嘢，怕係有塵入咗眼啩。」
阿文覺得蘇師奶唔想講，就轉口問：「姑姐，係唔係返屋企呀？」
蘇師奶遲疑咗一下：「 哦，未返住，我要去買啲嘢，行呢邊。」講完就向右轉過另一條街。
阿文就話：「咁好啦，一陣間見。」
望住蘇師奶纖瘦嘅背影，阿文腦海裡面快速回放一段段往事，令到佢嘅雙眼漸漸都溼溼哋。

由於蘇師奶契咗阿嫲，阿文無端端多咗個姑姐。一起首，阿文都唔識得點樣同呢位姑姐相處。尤其係「姑姐」硬係用一種充滿憐愛嘅目光望實佢，搞到佢周身唔自然。後來由超老闆同其他街坊口中聽得佢哋談論蘇師奶，這位姑姐嘅形象至漸漸豐滿起來。呢幾年，佢親眼見到蘇師奶嘅所作所為更加令到佢對呢位姑姐心懷敬佩之情。蘇師奶心地純良，憐貧恤孤。但凡有慈善籌款嘅活動，佢都不甘後人，樂善好施。除咗將自己嘅刺繡品拎出來義賣之外，佢仲經常捐出善款，幫助有需要嘅人群同機構。

至於阿文同嫲嫲，受到蘇師奶嘅照顧同幫助更係數之不盡。媽媽過身嘅時候阿文仲好細，加上長期同阿嫲一起住，故此對媽媽冇乜太大嘅眷戀。反而係阿嫲久唔久會將阿文攬埋身跟，用手摸住佢個頭話：「真係天冇眼啦，文仔咁細個就冇咗媽媽！」阿文有時會咁樣應個阿嫲：「唔怕！我有嫲嫲！」聽得阿文咁樣講，阿嫲對手更加肉緊咁將阿文攬到實一實。

爸爸嘅死訊對嫲嫲係一個沉重嘅打擊。嫲嫲三日三夜冇食過一粒米，一味不停咁喊。阿文當時返緊學，向學校請咗一個禮拜假喺屋企陪阿嫲。舅公同埋啲街坊鄰里都嚟到屋企幫手，幾經艱難至勸掂阿嫲。過後嫲嫲對啲街坊話，當其時佢真係宜得死咗仲好過，只不過唔捨得留低文仔孤苦伶仃，咁至監硬撐住。阿文知道，嫲嫲心裡面嘅傷痛並冇平復，只不過係強自壓抑咁啫。不過，嫲嫲盡量唔會喺阿文面前流露呢種哀傷嘅情緒。夜晚祖孫倆個喺屋企，嫲嫲有時會停低手頭做緊嘅工夫，出神咁望住阿生嘅遺像。但係只要感覺到阿文對眼望過嚟，嫲嫲就會對住阿文微微一笑，將目光移開，繼續做佢手頭嘅工夫。

蘇師奶認咗嫲嫲做契媽，嫲嫲身邊多咗個可以依傍嘅知心人。姑姐三頭兩日過來陪亞嫲，次次嚟嘅時候都會帶啲生果或者小點心。嗰段時間，嫲嫲都仲有接啲外發工嚟做，姑姐就陪住阿嫲一頭傾偈一頭做嘢。尾后姑姐話阿嫲年紀大啦，呢啲咁嘅工夫瑣瑣碎碎太過傷神，勸阿嫲唔好再做。其實嫲嫲自己亦都感覺有啲力不從心，只不過有呢個契女兒幫手先至能夠如期交貨，所以就唔再接外發嚟做。

呢段期間，蘇師奶一家亦都發生咗一啲變化。首先係佢個老竇因病去世，跟住佢阿哥同阿嫂離咗婚。前幾年，蘇師奶個老竇身體唔好，佢阿哥接手老竇嘅生意，繼續走東南亞條水。長年香港，南洋兩頭飛。聽講佢阿哥識咗個馬六甲嘅女仔，係佢一個客戶嘅女嚟，逗留香港嘅時間越來越少，導致阿哥阿嫂離婚收場。哥哥卒之同咗嗰個馬六甲女子結婚，頭家就安咗喺馬六甲。蘇師奶個媽媽稟承舊習俗跟個仔搬咗過馬六甲。蘇師奶喺香港就成咗「孤家寡人」，蘇師奶嗰幢四層嘅唐樓一下子顯得空蕩蕩。雖然三樓，四樓租咗出去，畢竟係租客，點都冇屋企人同住嗰種溫馨。蘇師奶就請契媽同阿文搬嚟同佢一齊住。阿文個嫲嫲眷戀舊居，唔係咁想搬，蘇師奶就日日嚟相請，終於請到契媽應承搬屋為止。住開嗰間舊屋點樣處置呢？蘇師奶建議唔好賣，租出去。一來有啲收入，二來阿文生性獨立，以後成家立室未必中意喺佢呢度住，咁樣就有一處退路。嫲嫲覺得呢個契女諗得好周到，就一一照辦。阿文一向尊重嫲嫲，自然唔會反對。揀咗個吉日，阿文就陪住阿嫲搬咗入姑姐間屋。蘇師奶將契媽間房盡量布置到同舊屋一樣，等契媽樣樣就手，一啲唔習慣都冇。姑姐又請阿文幫佢打理座唐樓嘅租務，維修，仲話要計返報酬俾阿文。阿文對姑姐表示，自己好樂意為姑姐打點日常事務，報酬兩個字就千祈唔好再提。蘇師奶知道阿文嘅性格，就冇再提呢件事，只不過暗暗為阿文準備咗一封「大利是」，作為第日佢結婚嘅賀禮。

蘇師奶幢四層唐樓，三，四樓出租，底層同埋二樓自用。蘇師奶，阿文同嫲嫲都住喺二樓。樓下有一個大廳，有兩間房同埋個天井。自從阿文倆婆孫搬咗入嚟住，呢度就熱鬧咗好多。阿文個舅公周不時嚟探望阿文個嫲嫲，蘇師奶經常就喺側跟服侍。當時舅公已經唔再經營戲班，不過周時同戲行中人小聚，操琴打曲。蘇師奶知道契媽鍾意聽粵曲，自己亦係自細就對粵曲感興趣，有一次閑談嘅時候就請舅公將佢哋聚會嘅地點改喺佢屋企。舅公即時企起身作個揖，撚起把聲，學足老生嘅腔口講咗句「固所願也，不敢請耳」，引得一屋笑聲。講起蘇師奶呢度嘅環境又確實幾吸引人嘅。大廳嘅隔扇打開嚟，面對住天井四圍嘅花花草草，真係心懭神怡。由於唔係向正大街，喧鬧嘅街聲就顯得遙遠微弱，自成一個恬雅嘅角落。從此蘇師奶呢度就成為舅公同佢啲曲友「打躉」嘅所在啦。

阿文除咗學寫粵曲，佢都鍾意玩下樂器。佢比較鍾意管樂器，不過就唔係中國嘅蕭笙管笛，他鍾意俗稱「黑管」嘅單簧管。當年佢個老竇阿生有時帶佢去舅公嘅劇團度玩。佢精乖伶俐，把口又甜，逢人就叔叔阿姨，哥哥姐姐係咁嗌，啲大人都好惜佢。過得一排，劇團裡面各種中樂器佢都識得七七八八。有一勻，佢見一位樂師休息嘅時候拎出一支黑掹掹嘅管來吹，音色同佢聽過嘅所有中國樂器都唔同。佢就問個叔叔係乜嘢樂器？叔叔話佢知，嗰支嘢叫做「黑管」，係西人嘅樂器。佢就問粵曲里頭用唔用得到？叔叔話都有用，不過用得相對要少啲。叔叔有心演嘢，為阿文演奏咗幾段樂曲。「黑管」嘅高音清晰明亮，低音又渾圓豐滿，令阿文深深著迷，就同老竇提出嚟要學吹「黑管」。父親話佢年紀仲細，要學吹單簧管會有啲困難，就買咗一支「牧童笛」俾佢作為學習西洋管樂器嘅入門。阿文好俾心機學，好快就掌握咗吹奏牧童笛嘅技巧，悠揚嘅笛聲經常由阿文屋企飄送到隔離鄰舍。

阿文十三歲嗰年，佢老竇出海返嚟帶咗一支單簧管俾阿文作為佢嘅生日禮物，而且托舅公為佢搵咗一位老師。經過幾年嘅學習，阿文已經能夠加入到舅公嗰一幫戲行前輩之中，同佢哋一齊玩音樂。舅公呢一個班底嘅「根據地」轉移到姑姐屋企之後，阿文就主動承擔起準備茶水，執拾場地嘅工作。班前輩喺呢個舒適嘅環境裡面，吹，拉，彈，唱，使出渾身解數，將佢哋各自嘅長處發揮得淋漓盡致，阿文由佢哋身上學咗唔少粵曲演奏同埋演唱嘅寶貴經驗。阿文嘅嫲嫲同姑姐有時會落樓欣賞佢哋嘅演奏。有時阿嫲陪住姑姐喺二樓繡花，一陣陣忽遠忽近嘅音樂聲就作為背景音樂。阿文個嫲嫲有咗好很明顯嘅改變，面上經常流露出滿足自在嘅神情。街坊鄰里都話嫲嫲返老還童，越嚟越後生。阿文知道，呢啲都係姑姐嘅功勞。

路邊忽然傳來一陣柔美嘅國語女聲合唱：莎莉南蒂，親愛的姑娘，妳為什麼兩眼淚汪汪？親愛的爸爸，親愛的媽媽，是那灰塵吹進了我的眼......

阿文諗：灰塵吹入眼，真係一個好普遍嘅藉口。只不過唔知姑姐遇到乜嘢事。
呢個時候，經營一間電器維修店嘅「印尼仔」向阿文打咗個招呼。阿文應咗佢就繼續向前行。歌聲就係由「印尼仔」間鋪頭傳出來。「印尼仔」唔係印尼人，佢係印尼華僑。當年佢嘅父母受到祖國嘅感召，將佢送返祖國讀書，點知前年佢同表哥一齊偷渡嚟咗香港。原本佢諗住通過香港作為跳板返番印尼嘅，估唔到印尼對於佢哋呢啲曾經離開印尼返大陸嘅人深懷戒懼，連探親旅遊嘅申請都唔批，返屋企團聚就更加冇得傾。佢同表哥就咁滯留咗喺香港。好彩屋企經濟情況都幾好，「印尼仔」又有電器維修嘅技術同興趣，就用屋企寄嚟嘅錢租咗一間屋，前鋪后居。佢同表哥住后疊，門面就接啲安裝，維修電器嘅工夫嚟做。「印尼仔」做嘢嘅時候經常播放一啲印尼歌曲，得閑又會坐喺鋪頭門口，拎住把吉他自彈自唱。啲街坊由此接觸咗唔少印尼民歌。乜嘢「星星索」，「梭羅河」，「划船歌」，「哎喲媽媽」等等等等，街上班後生同細路個個都哼得幾嘴。