廟街夢幻曲 之三

阿文唔知道「超記茶餐廳」裡面講緊佢嘅家史，佢一邊走一邊諗緊最近郁手寫嘅嗰一曲《南浦送別》。呢支曲嘅靈感來自唐朝大詩人白居易嘅《南浦別》。原詩只得廿幾個字，佢想寫出一支有如《桃花依舊笑春風》咁嘅曲嚟。

黃昏的陽光透過大榕樹密密麻麻嘅樹葉喺「天後廟」前嘅水泥地塘上織出一張光網，啲老街坊三三兩兩咁坐喺石板條凳上。呢度啲老人大多數都認得阿文，阿文少不免同佢哋一一打招呼。一打招呼就將佢原先嘅思路打斷咗。阿文一諗算罷啦，都係返到屋企至斟酌咯。放低咗心事，阿文至發覺今日「榕樹頭」嘅氣氛同往常有多少唔同。除咗啲老街坊常客，多咗啲打扮得花枝招展嘅妙齡女子，仲有一啲往常好少喺度玩耍嘅細路喺大樹之間奔跑追逐。佢正想話搵個人問下，忽然間望見東邊空地上搭起咗一座小舞台，上面一條橫額寫住《廟街坊眾慶賀小桃紅從藝三十年晚會》。原來係紅姐返咗嚟，唔怪得平常冇乜講究嘅老街坊都著返件「飲衫」，好似過節咁。「小桃紅」係廟街人嘅驕傲，佢由一個街頭賣唱嘅妹頭蛻變成今時今日享譽港，澳，星，馬嘅大歌星，三十年來嘅努力同機遇，係廟街人永遠嘅話題。

三十年前，廟街有一個賣唱家庭，由一對夫妻帶住三個細路每日穿梭喺各大茶樓酒館賣唱。當年呢啲歌者毫無社會地位，比沿街乞討的乞兒略為好一啲，但係亦都經常要睇人眼色。三個細路之中，老二小紅能歌善舞，嘴仔又甜，有啲客人本來唔想聽曲，小紅都有能使到佢哋改變初衷。一個偶然嘅機會，令到小紅跳出咗街頭賣唱嘅行列，有機會喺舞台上展現佢嘅才華，因為佢遇到咗一個貴人。

小紅當年遇到嘅貴人就是佢嘅恩師「銷魂鶯」。講起呢個「銷魂鶯」原先亦係一個好有名嘅粵劇老倌，佢擅唱子喉，曾經係一個好出名嘅花旦，仲出過唱片，原來嘅藝名係「柳聞鶯」。戲劇改革以前，男女不能同台演戲，所以女角亦都要由男人嚟扮。「銷魂鶯」嘅子喉唱得有一種特殊嘅韻味，當時曾經有報道話佢嘅唱腔「比女人仲有女人味」，有人仲贊佢嘅歌聲「直教人魂銷神授，不能自持」。後來佢就用「銷魂鶯」做咗藝名，一時間譽滿省港，各大戲班爭住搵佢埋班，皆因「銷魂鶯」三個字就係票房嘅保證！可惜呢種風光嘅日子冇幾長久，因為佢冇耐就失咗聲，唔再唱得戲。關於佢失聲嘅原因有好多種唔同嘅講法，但係從來冇人能夠由佢口中得到確實嘅答案。最為大眾接受嘅一種講法係因為得罪咗一個「大天二」。

話說「銷魂鶯」名頭大振嘅時期，曾經被人請去「出堂會」。佢一向甚少「出堂會」，所以亦都唔想應承呢台戲。無奈戲金非常豐厚，而且對方係一位好有來頭嘅「大天二」，若果逆佢意唔知會有乜嘢後果，故此好多人勸佢勉為其難去一趟。「堂會」演得好成功，「大天二」覺得好有面子，除咗戲金之外，仲封咗個大利是俾「銷魂鶯」。咁嘅事情「銷魂鶯」都唔係第一次見，略為推辭就收咗。過得一排，個「大天二」使人嚟請「銷魂鶯」到佢嘅莊院住幾日。「消魂鶯」早就聽聞呢個「大天二」好男風，上次出堂會嘅時候已經係步步小心，今勻仲會咁輕易落疊咩？於是婉言推拒。點知個「大天二」好似溼手揦麵粉 - 捹都捹唔甩，一次又一次咁使人相請，「消魂鶯」亦係一次又一次咁推搪，終於激嬲咗個「大天二」，出到聲話要令「消魂鶯」由戲行消失。「消魂鶯」亦都知道個「大天二」心狠手辣，之不過諗到自己多數喺省城，斷估個土皇帝對魔爪未伸得到咁長，故此當佢只不過係跌落地揦返揸沙。「大天二」一連幾個月冇嚟騷擾，「消魂鶯」以為事情就咁過咗去，繼續安安心心咁唱佢嘅戲。直到有一日，佢喺台上演唱自己手本名曲嘅時候突然間失咗聲，同時自己個「近身」又不辭而別，佢至意識到可能遭人暗算。但係無贓無證，唯有暗啞抵，從此退出舞台。

「消魂鶯」冇法子再唱大戲，只好另謀生計。佢返到家鄉東莞一個小鎮，租了一個鋪面，賣「和順欖」，「加應子」，「糖梅姜」，「話梅」呢類口垃雜。「和順欖」又叫做「丁香肉桂欖」，顧名思義就係用丁香同肉桂嚟腌制橄欖。「和順欖」滋味勻長，往往係橄欖肉嚼完粒核都仲有味。「加應子」有啲似番鬼佬嘅蜜餞「西梅」，係用大粒嘅李干同白糖為原料，加上幾味中藥材嚟調味，真空濃縮熬煮。成品甜而不膩，果肉綿軟又有嚼頭，係深受大眾歡迎嘅零食。「消魂鶯」所賣的零食質料上乘，加上鄉親哋同情佢嘅遭遇，都好肯幫襯佢，故此佢嘅生意都唔錯。可惜好景不長，佢所得罪嘅嗰個「大天二」竟然雇咗班爛仔嚟搞亂檔，白食白拎仲要恐嚇其他客人。「消魂鶯」眼見冇法子捱落去，唯有執咗檔生意，搬返省城度住。返到省城做乜好呢？佢都係賣零食。今勻佢唔再租鋪，而係將啲零食擺曬落個大簸籬，去煙檔同大檔兜售。當年省城嘅煙館同大檔遍地開花，加埋佢賣貨好有噱頭，故此生意零舍好過人。佢嘅噱頭就係穿戴打扮得好似戲台上嘅梅香，賣嘢嘅時候扭腰碎步學花旦走台步嚟取悅客人。49年以後，省城禁煙禁賭，佢嘅生意一落千丈，唯有落香港投靠一個老朋友。佢呢個老友喺廟街有層樓出租，就將其中一間房租咗俾佢。「消魂鶯」諗唔到竟然喺廟街見返好多以前嘅同行，故此亦都不愁寂寞。當年有啲藝人沾染咗唔好嘅習氣，嫖賭飲盪吹，無所不好，因此晚景凄涼。「消魂鶯」屬於潔身自愛嘅一個人，而且一貫秉承「身後有餘忙縮手」嘅古訓，因此到咗香港手頭都仲有啲積蓄，粗茶淡飯，間中嘆下「一盅兩件」都仲得。

有一回，一個戲行嘅朋友請「消魂鶯」喺酒樓食晚飯，聽到小紅喺隔離包廂唱小曲，覺得個細路女把聲唔錯。佢嘅朋友叫個企堂等小紅唱完就嗌佢過嚟。小紅為「消魂鶯」同佢嘅朋友唱咗兩支曲，兩人大為讚賞。「消魂鶯」覺得小紅嘅根基唔錯，從此免費教佢唱戲。小紅由「消魂鶯」度學到好多粵劇嘅基本功，為佢後來登上舞台打落厚實嘅基礎。由於消費模式嘅改變，小紅並冇喺粵劇舞台走紅，反而係後來逐漸興起的「粵曲小調」造就咗佢嘅名氣。令佢聲名大噪嘅係連唱十二首《小桃紅》，係由當時一位作曲家根據古詞所寫嘅套曲。從此「小桃紅」個名就叫開曬啦。呢十二首曲佢後來到冇乜唱晒成套，通常都係唱其中兩三首。

幅橫額令阿文諗返曬由啲老叔父口中聽返嚟嘅呢啲梨園軼事，不由得有些微白雲蒼狗嘅感慨。東邊的角落忽然起咗一陣騷動，阿文擰轉頭望向東邊，只見一群人簇擁住一位女子緩步行近舞台。個女子四十幾歲，著住一件衫裙，上身係象牙白，由腰部開始漸漸有些少紅色，越落越深，到裙擺部分就係一片桃紅，呢位就係「紅姐」啦。「紅姐」喺啲街坊頭面人物嘅陪同下喺舞台前面款款落座，舞台上弦索之聲即時響起，二十幾個一色桃紅衣裝嘅妙齡女子魚貫而出，企成兩排。前奏之後，班女仔輕啟朱唇，柔美嘅歌聲隨風吹遍成個「榕樹頭」：

採蓮人語隔秋煙　波靜如橫練　入手風光莫流轉　共留連　
畫船一笑春風面　江山信美　終非吾土　問何日　是歸年　

阿文知道呢首係元朝詩人，文學家王惲 嘅作品，正係十二首《小桃紅》之一。呢個詞牌亦叫做《平湖樂》，仲有一個叫法係《採蓮詞》。阿文聽過「紅姐」演唱這支曲，唱到結尾嗰句「問何日 是歸年」時，台下聽眾無不動容。

一曲既罷，阿文見時候唔早，繼續起行返屋企。