初來甫到

在網上漂流，不覺來到「貝殼村」，發現還有「廣東老鄉」版塊，真有一種相逢恨晚的感覺。原來當年放到網海之中的一個小玻璃瓶竟然還曾經漂到這裡（《廟街夢幻曲》），更是喜不自勝，可惜只有第一章。為免朋友們以為該文已經「太監」，特此重新整理，發到本村，以續前緣。敬請圍觀，歡迎拍磚。

廟街夢幻曲

阿文左手挽住個新買嘅 紅 A 塑膠桶，行出「超記茶餐廳」，聽見超老闆大聲咁嗌：「走咁快做乜啫？仲有幾粒鍾至開檔噃.」
阿文唔理佢，遞高只右手揚一揚，繼續向前行。

茶餐廳裡面，周老闆頭擰擰咁話：「呢一個阿文，十足佢個死鬼老竇，一頭舂咗落粵曲度。直頭當打曲系佢第一生命。」
幾個老街坊頭嗑嗑，大表贊同。
「乜佢老豆過咗身啦？」搬入呢條街冇耐嘅許先生問。
許先生系退休公務員，食緊長糧。雖然搬咗嚟得個零月，勝在份人隨和好傾，唔少街坊都幾中意同佢傾偈。有人問許生點解有洋樓唔住走嚟住唐樓？佢話老婆死咗，仔女又去曬外國，住喺洋樓覺得好孤獨。於是賣咗層洋樓喺呢度買層唐樓住，樓底又高，又多街坊，開心好多。

「係呀。講起嚟都有段古架，叫阿超講啦。」林伯回應許生嘅說話。
許生帶住期望嘅眼光望下櫃檯後面嘅超老闆。超老闆見人客唔喺咁多，拈起個好骨子嘅紫砂茶壺，對住壺咀啜咗一啖穠普洱，施施然咁開講啦：阿文個老豆叫做阿生，自細同我玩到大嘅。阿生份人真喺好鬼精乖伶俐。佢整嘅定螺轉得耐過人；佢做丫叉一定要搵生得好對稱嘅番石榴丫，慢慢執靚佢，故此好使好用。佢唔單止識玩噃，讀書都好叻，中學年年都考前三名！故此好輕易就考到入《香港大學》。

「個陣時讀大學要好多錢嘅噃，乜阿生屋企好有家底嘅咩？」許生又問啦。
超老闆望佢一眼，介面話：咁佢又唔系好有。阿生個老豆同我伯爺一樣，都系行船嘅。不過佢老豆喺機房，我伯爺喺廚房。佢哋兩老都系同太古打工。阿生個老豆做嘢仔細又好交帶，佢個西人老頂好睇得起佢。個老頂知道阿生讀書好叻，就出頭向公司幫阿生申請咗筆助學金，咁阿生咪有得讀大學啰。阿生個老豆開心到不得了，成日話今次真系家山有福啦，屋企出咗個大學生。點知人算不如天算，未等得到個仔畢業佢就行咗去咯！

講到呢處，超老闆有啲傷感，停咗口。班街坊有人垂頭嘆息，有人望住杯咖啡粒聲唔出。過咗一陣，超老闆輕輕咳咗一聲，又繼續講落去：阿生大學第三年，佢老豆落嘅個條船響馬六甲沉咗，死咗幾個人，阿生老豆就系其中一個。好在公司有筆撫恤金加埋啲助學金，阿生同個老母都叫做有啖飯食兼且可以完成學業。阿生讀完大學，又入咗太古做嘢，之不過佢唔系行船。阿生讀電機系，畢業后太古收咗佢入船塢度做，人工都唔錯。阿生個人好孝義，知道個老母鐘意聽粵曲，先係買咗台收音機，後來又買咗架留聲機同埋好多唱碟畀佢老母聽。得閑又帶佢個老母去睇大戲。。。。。。

超老闆啱啱停口，門口有個人大大聲咁話：「超老闆又有嘢講呀？今勻講時聞定講耶穌呀？」班街坊聽聲就知道個「飛機頭」嚟咗。
林伯對住行緊入門口果個三十零歲，著件花恤衫，梳個飛機頭嘅男人揖下只手講：「飛機頭，咪鏨亂歌柄啦，講緊阿文老豆阿生段古呀。」
「飛機頭」搵個位坐低，對個企堂話：「一個茶餐，飛沙走奶，快馬！」跟住對大眾拱下手話「唔好意思，超老闆繼續啦。」
又細細聲咁問林伯：「講到邊度啊？」
「講到睇大戲。」
「悲劇，悲劇，悲劇開始啦。」

超老闆矋咗」飛機頭「一眼，啜咗啖茶，繼續講啦：阿生份人天分好高，學樣樣嘢都好快上手。細時聽收音機播粵曲佢跟住嚟唱都唱得有板有眼，陪佢老母去睇咗幾次大戲啫就上咗癮啦。佢唔單止鐘意聽鐘意睇，仲學埋打曲添。佢周不時將自己打嘅曲攞去請教啲開戲師爺，一嚟二去就識咗個「二幫花旦」阿玉。呢個阿玉細細個就死咗父母，系個孤女。有個戲班班主系佢舅父，收留咗佢，故此佢自細喺戲班大。阿玉性情好好，講嘢陰聲細氣。有時同阿生返屋企嚟坐，隔離鄰舍啲靚妹吱吱喳喳咁問長問短，佢一味笑眯眯咁同佢地傾講，絕冇嫌煩。阿生高大斯文，阿玉就靚女溫柔，真系登對到唔恨。阿生老母都好鐘意呢個未來心抱，成日同阿生講：若果真系鐘意人嘅就早啲娶人過門，咪唔嗲唔吊得架。阿生知道個老母恨飲心抱茶，於是就使人向阿玉舅父提親。阿玉舅父都好鐘意阿生呢個後生仔，一口就應承咗呢頭親事。揀咗個良辰吉日，擺咗幾圍，咁呢對金童玉女就拉埋咗個天窗啦。話就話擺幾圍，查實就巴閉過出會。皆因阿玉果班送嫁姐妹個個都系撈戲行，身材樣貌都有番咁上下，搞到條街啲靑頭仔借頭借路行出行入嚟睇靚女。啲細路就圍住阿生老母氹氹轉。阿生老母笑到見牙唔見眼，一味派糖畀啲細路。第二年，阿玉就生咗阿文啦。講開又講，阿文仔又幾特別架，第啲細蚊仔出世都系烏下烏下一味瞓覺，佢一抱出產房啫就擘大雙眼四圍睩。有樣嘢又幾得意噃，文仔自細就鐘意聽粵曲。有時佢扭計喊呢，阿玉一開聲唱兩句啫，佢就停架啦。本嚟一家四口都幾安樂，點知過咗兩年，文仔兩歲幾嘅時候，亞玉畀人說幾說，返咗省城。。。。。。

講到呢度，超老闆忽然轉口對喺門口行緊入嚟嗰個女人話：「蘇師奶！埋便坐呀。」，又叫個企堂「阿福，招呼蘇師奶。」，然後擰轉頭對坐喺近住廚房個鬍鬚佬話：「大花面，省城嗰筆等你嚟講啦。話曬你哋都喺同一個飯堂食過飯呀。」

許生知道個鬍鬚佬叫做阿彪，喺戲班唱大花面，不過就唔知佢返過省城，於是問阿彪：「彪哥！乜你都返過上便撈咩？」
阿彪個樣胡須勒突，但系舉止就都幾斯文。佢飲咗啖奶茶，抿下個咀，滋滋悠悠咁開聲啦：嚡！萬事都系整定嘅。嗰幾年香港環境好曳，好多人冇工開，自不然就冇人睇大戲架啦。冇人睇大戲我哋就冇班埋，冇班埋就冇入息。好似我咁，雖然唔至於話餐搵餐食餐餐清，之但系都差唔多手停口停咖。咁啱有人嚟說我上省城，話省城好環境，日日有工開，人人有飯食。我諗下與其喺香港望天打掛，不如返上去搏下，於是就應承咗嗰個人。我問佢幾時成行，佢話冇咁快，因為要等齊人至一齊上。過得一排，阿生倆公婆忽然間嚟搵我，話亞玉要返省城參加工作，得知我都會返上去，於是托我就近照顧下亞玉。我聽到愕曬然。我就話單身寡仔，拍手無塵，話行就行嗟，亞玉有頭家，乜佢捨得咖嗱？亞玉話，係就係唔捨得咖啦，之不過加陣一家人指擬曬生哥都唔係長久之計。聽講上便好需要各行各業嘅人才，我諗住先上去探下路，如果搵到份好工畀生哥，話唔埋全家搬返上去住添。聽落都有道理，不過我硬係覺得有啲唔妥，但系又諗唔出邊度唔妥，於是就拍心口應承咗佢哋。

講到呢度，阿彪拎起杯奶茶，想話飲啖茶潤下喉，點知個杯乾曬塘咁滯。佢放低個杯，叫阿福落過張單。
「飛機頭」同阿彪隔咗幾張台，懶好口咁話：「彪哥！唔介意嘅話，整住啖齋啡先啦。」
阿彪對住「飛機頭」反下對眼話：「整你個頭，你自己嘆啦。」
「飛機頭」拎起只杯自己飲咗一啖，嗒下咀咁話：「唔飲慳番。」
話口未完，阿福已經攞咗杯「絲襪奶茶」畀阿彪。

待續......

歡迎新老鄉，古仔好有香港味，由其系絲襪奶茶

舊年翻去，廟街夜晚移家好似無擺檔唱粵曲啦！

廟街的人文風情已經無復舊觀，如今純粹是一個平價貨物集散地。
倒是廣州「荔灣湖公園」有一檔「以曲會友」可供粵曲「發燒友」一展「喉底」。

去年十月北游在「荔灣湖公園」所見：

雲鄉客 發表於 2013-5-3 14:41
去年十月北游在「荔灣湖公園」所見：

好有廣州味！致在街坊同樂一樂也！

雲鄉客 發表於 2013-5-3 14:41
去年十月北游在「荔灣湖公園」所見：

好有廣州味！致在街坊同樂一樂也！

中央公園也幾好。


http://my.backchina.com/home.php ... =blog&id=162693

好耐無返黎喱度,近排多咗不少鄉里,真是要多啲上嚟傾偈,

好似又返左廣州，好啱睇。

中央公園，細時成日爬入去玩。文革后就好少去了，附近住著好多同學

也曾在中央公園的迷你泳池游水