廟街夢幻曲 之十一

由於接觸咗「番鬼佬大戲」嘅緣故，阿文亦開始聽一啲西洋古典音樂。阿文原來都有聽歐西流行曲，但係西洋古典音樂除咗旋律好唔一樣之外，樂器嘅配撘更為複雜，音樂嘅表現力亦顯得更為豐富。喺習慣咗《平湖秋月》，《餓馬搖鈴》，《燭影搖紅》呢類樂曲嘅耳仔聽嚟，呢啲西洋樂曲帶嚟好大嘅衝擊。尤其係樂曲嘅題材更係同國樂唔同。第一次睇到《快樂寡婦圓舞曲》嘅曲名，阿文仲以為係印錯咗。請教過「阿二」至知道呢首係一齣輕歌劇嘅插曲，年代唔算好遠，但係知名度都幾高。

睇住就快返到屋企啦，阿文諗起最近聽過嘅《軍隊進行曲》，嘴裡面輕輕哼起來，左手拎著嘅塑料桶隨住旋律捹下捹下。陶醉之間左手忽然一輕，個塑料桶竟然甩咗手。阿文定神一望，原來係花名「馬騮仔」嘅靚仔將個塑膠桶搶走咗。

「馬騮仔」係廟街嘅一個開心苦命人。佢一出世就被遺棄喺「天後廟」門口，係當時嘅廟祝將佢執返廟，再向民政局申請咗撫養權。一歲之前，廟祝抱住「馬騮仔」挨家過戶請啲屋企有細路食緊奶嘅大嫂大嬸喂下佢。佢嘅所有衫褲鞋襪亦多數係由各位街坊你一件我一件咁送嘅。到咗返學嘅年齡，廟祝幫佢起咗個大名「沐神恩」，希望佢能夠繼續得到神嘅眷顧。不過，除咗學校老師點名嘅時候，多數人都叫佢嘅花名「馬騮仔」。一來因為佢生得奀瘦，二來由於佢成日擒高爬低。雖然身世可憐，「馬騮仔」係一個個性好開朗，心地又善良嘅好細路。佢每日幫手做廟裡面嘅雜務唔在講，街坊鄰里有需要幫忙嘅地方，佢都事必撘把手出分力。

見搶走個桶嘅人係「馬騮仔」，阿文一啲都唔著急，淨係把口話：「你隻馬騮仔呀，快啲俾返個桶過我。」
「馬騮仔」一邊慢慢跑，一邊唱：「追得到，俾個錢你買紅棗，追唔到，你就乜都冇。」
阿文知道「馬騮仔」撩佢玩，本嚟唔想理佢，等佢自己無癮，稍後自然會將個桶送返嚟。不過見到佢停係一幢樓梯口，右手食指向上指咗幾下，明白佢係要引自己上樓。阿文想睇下佢搞乜東東，於是就跟住佢上樓。呢一座係六層嘅唐樓，佢哋一直向上行。六樓再上就係天台，「馬騮仔」喺天台門口停咗腳步，擰轉頭豎起右手隻食指喺嘴中間示意阿文唔好出聲。見佢咁嘅貓樣，阿文不由覺得好笑，向他嗑下個頭表示明白，同時放輕腳步行出天台。天台上面有一排五間鐵皮屋,比較接近天台門嘅四間房都鎖住門，即係話屋主仲未返嚟。唯有最尾一間房門開住。阿文知道嗰間房個住客叫阿強，係車行嘅師傅仔。阿文一頭霧水咁望住「馬騮仔」。「馬騮仔」向佢揖下手，帶住佢兜鐵皮屋嘅後面一直向阿強間房行過去。

行得近就聽到屋裡面有人講嘢。最先聽到嘅係一把女仔聲。
佢話：「我唔理，總之我冇應承。」
阿文聽得出來，講嘢嘅係張裁縫個女阿蘭。係唔係阿蘭同阿強嗌交呢？
再行幾步就到咗間房嘅後窗。透過薄薄嘅蚊帳見到屋裡面有三個人。阿蘭鼓起泡腮坐喺飯台旁邊唯一嗰張椅度，佢個大佬阿柏面懵懵咁企喺房門邊。主人阿強企喺在兩個人之間，望下阿蘭又望下阿柏，唔知點好。
三個人有一排唔開聲，間房裡面嘅空氣密度似乎越來越濃。呢個時候阿強輕輕咁講咗一句：「既然你阿哥應承咗人囉，不如妳就去一趟？」
話口未完，阿蘭即刻嬲爆爆咁話：「你好想我去識嗰個四眼龜，二世祖咩？」
阿強將個頭略略耷低，更加輕聲講：「咁又唔係。」
聽到呢度，阿文大致上已經知道係乜嘢一回事。

張裁縫好好手工，手頭上有唔少長期客仔，加埋早年時低價買咗幾層樓收租，喺廟街算得上係中上人家。個仔阿柏舊年啱啱考入大學，讀「比較文學」，同學之中有一個有錢仔同阿柏好老朋。呢個有錢仔去過阿柏屋企，對阿蘭一見鍾情，諗咗好多計約阿蘭，阿蘭硬係唔瞅唔睬。呢次怕係由阿柏出頭請阿蘭，阿蘭照舊唔騷佢。張裁縫呢對仔女性格相反。哥哥生性荏弱欠決斷，妹妹就快人快語，敢作敢為。

兩年前，阿蘭喺女子中學讀中三，有一次喺學校附近被幾個街邊爛仔糾纏，成班女仔嚇到面都青埋。咁啱阿強路過，見到咁嘅情形就上前幫佢哋解圍。幾個爛仔恃住人多，對阿強單單打打，仲隨時會郁手咁架勢。
阿強由個工具包裡面摷咗支大號士巴拿，右手揸住，一下一下咁拍落左手掌心，問嗰幾個爛仔：「隻抽定係齊齊上？」
幾個爛仔一睇阿強手瓜起腱同埋把咁有分量嘅士巴拿當堂謝曬雞，一路褪后一路話：「夠姜你就唔好走。」
阿強粒聲唔出，淨係對住佢哋冷笑。見到幾個爛仔行遠咗，阿蘭同佢啲同學齊聲多謝阿強，原來雄赳赳氣昂昂嘅阿強呢個時候怕起羞嚟，搏命咁灑手擰頭話唔使多謝。

阿強同阿蘭住得唔遠，兩家經常會碰面，不過以前從來未有交談。經過呢次事件，阿蘭開始對阿強另眼相看。阿蘭知道阿強有個花名「湖南仔」，但係由佢嘅口音又聽唔出佢係外省人。後來至知道阿強祖籍確實係湖南，不過佢係喺廣州長大，所以一口白話相當標準。阿強嘅父母都係《西南聯大》最後一屆畢業生，49年以後喺廣州教書。57 年積極響應「整風」運動，提批評意見，獻建國方略，結果跌咗落人哋嗰嗰「陽謀」嘅氹度，齊齊被打成「右派」。好彩兩個人嘅教學水平比較高，情節又唔算嚴重，逃過咗送去「勞動改造」嘅劫難。當其時阿強同佢個哥哥讀緊小學，由於「右派崽」嘅身份令到佢哋兩兄弟被人睇唔起。哥哥性格暴躁，一撻就著，經常同嘲笑佢哋嘅靚仔斗鬧。有啲家長見到就向學校領導反映，領導就向阿強嘅父母施壓。父母一次次咁勸阿強兩兄弟要低調做人，努力學習，提高自己嘅內在力量，唔好同人哋作口舌之爭。阿強唔想令到父母難做，就盡量唔同啲細路摩擦。後來學識吹笛，佢就將自己嘅情緒通過支笛來宣洩。

阿強個哥表面上唔再同學校啲細路嗌霎，暗中就結交咗學校附近其它少年，形成一個守望相助嘅山頭。隨住年齡增長，平時同佢哋為敵嘅人逐漸亦都少咗。但係，來自「政策」方面嘅壓力一啲都冇少到。「史無前例的文化大革命」期間，佢哋嘅父母被勒令離開廣州市，返回自己家鄉。家鄉嘅鄉親對佢哋一家倒係好照顧，並冇難為佢哋。不過，阿強個哥認為踎喺家鄉終歸唔會有前途，於是聯絡咗廣州嘅朋友，帶住細佬偷渡到咗香港。由於哥哥交遊廣，係香港都有一啲朋友，兩兄弟好快就搵到嘢做。阿強喺車行學修車，哥哥喺建築地盤做雜工。有咗收入，兩兄弟就租咗廟街呢間鐵皮屋嚟住。呢類鐵皮屋屬於「僭建物」，唔受租務條例保障。而且冬天寒風會透過鐵皮嘅罅隙捐入屋，夏天猛烈嘅太陽就將成間屋曬到好似個焗爐，太陽落山好耐溫度至會降低。室內以至天台都冇廁所，住客要去街上嘅公廁解決。雖然條件好差，但係租金相對低廉，非常適合收入唔多嘅人租嚟住。

到香港嘅第二年，阿強個哥哥聽講南太平洋上嘅「諾魯共和國」請勞工挖礦，人工幾高，就應徵去咗嗰個島國。據哥哥寫信返嚟講，嗰度係一個好靚嘅島國，全國面積只得 22 平方公里，盛產磷酸鹽礦。哥哥喺嗰度挖礦唔算辛苦，收入就好好。諾魯嘅幣值同澳洲差不多，計返港紙一年收入就頂幾年。之不過呢個國家除咗礦業，基本上冇其它產品，所有食物同淡水都要靠入口。

最近兩年，阿蘭經常嚟阿強間鐵皮屋，佢中意聽阿強吹笛。阿強會吹好多笛子曲，阿蘭最中意聽《鷓鴣飛》。佢話呢首曲帶俾聽嘅人一幅祥和畫面：鷓鴣係空中自由自在咁飛，有時借住風力滑翔，有時振翅直衝雲霄......阿柏對於妹妹同阿強嘅來往從來冇表示過意見，查實內心唔係咁認同。不過佢知道個妹嘅性格，所以唯有儘力轉移佢嘅注意力。同學兼老友對妹妹有意思，佢好樂意敲敲邊鼓幫下腔。今次係同學請佢哋倆兄妹去「告羅士打餐廳」食晚飯，阿柏一口應承咗，勢估唔到被個妹一口拒絕，落唔到台。

阿文聽到呢度，由屋後面兜返前面。阿強眼利，最先見到阿文，於是打咗個招呼。阿柏同阿蘭跟住亦分別同阿文打咗招呼，阿蘭仲企咗起身讓座。阿文擺擺手，自己坐落阿強張床。由於間屋面積唔大，放唔落兩張床，所以阿強兩兄弟瞓嘅係「碌架床」。阿強個哥走咗以後，上層就用來放雜物。
阿文坐係下層床邊，笑住問阿蘭：「做乜又同阿哥霎氣呀？」
阿蘭話：「邊個同佢霎氣啫，係佢太過唔尊重人，戥我應承嗰個四眼龜，二世祖，要同佢一齊食飯。」
阿文話：「阿柏你確實做得唔啱，同邊個人交往，阿蘭有自主權，你唔應該冇徵求佢嘅意見就代作安排。不過，阿蘭妳亦有唔啱嘅地方噃。」講到呢度，阿文略略停咗一下。
阿蘭介面就問：「我有乜嘢唔啱呢？」
「你口口聲聲叫你阿哥個同學做四眼龜，二世祖係唔啱咖。」
「有乜咁唔啱啫？」
「妳係唔係因為佢戴眼鏡所以叫佢四眼龜呢？」
「是啊！」
「咁妳阿爸才叔都戴眼鏡，咁才叔係唔係四眼龜呢？」
「我阿爸戴就唔係，佢戴就係。」
「哦，我明白啦。咁妳又點解話人哋係二世祖呢？」
「佢屋企有錢，佢就係二世祖。」
「錯啦。恃住屋企有權有勢或者有錢，吃喝玩樂，不務正業嘅至叫做二世祖。你阿哥個同學唔算。」
「你又知？」
「佢次次來搵你阿哥，都係由屋企個司機開車送佢嚟。但係怕你哋話佢演嘢，總係叫司機將架車停喺「超記茶餐廳」門口，然後行去妳屋企。個司機有時會入超記飲杯咖啡，傾下閑偈。據佢講，佢嘅老闆只得呢一粒仔，當正係金簸籮，所以佢去邊都要有司機陪住。但係呢個少爺仔讀書好勤力，心哋又好，好肯幫人咖。」
講到呢度，阿柏介面話：「係呀，次次同學有困難，佢都好熱心咁幫人咖。」
阿蘭矋咗佢阿哥一眼，冇出聲。
阿文又講：「我正話聽到阿柏已經向你道歉，我亦希望妳俾面阿哥。食餐飯唔係咁大件事啫，何況我聽人話，《告羅士打》啲西餐好正，希望食過返嚟話俾我哋聽佢點正法，等阿超老闆啲豉油西餐都改進下。」
阿蘭聽見阿文話超老闆啲係豉油西餐，笑住口話：「既然文哥咁講，我就聽文哥話。」
阿文又笑住講：「咁就啱啦，攞啲風度出嚟，咪個畀人睇小我哋廟街啲女仔。係啦，如果你真係好唔想同佢再有乜交往。就清清楚楚咁話佢知，叫佢以後唔使再約妳，因為妳淨係中意阿強......」
阿蘭一聽，塊面紅曬：「哎呀！文哥你好衰咖，人哋又冇咁講。阿哥，我哋快啲走。」
阿柏連除話：「好好好，我哋即刻走。」
阿強喺側根傻笑。「馬騮仔」喺外面拍住手話：「散場囉，冇戲睇囉。」
阿文企起身，對阿強話：「我都要返去啦。」
然後伸出右手對「馬騮仔」講：「拎返嚟！」
「馬騮仔」將塑膠桶拋過來，阿文一手接住，伸出右腳作勢要踢佢。「馬騮仔」一閃，踢唔到。

阿文一腳踢空，眼前天台鐵皮屋冇咗，「馬騮仔」同阿強亦都唔見咗人，自己原來坐喺屋企客廳張沙發度。姑姐蘇師奶企喺自己面前，笑笑口問：「點呀，起曬飛腳咁，發夢同人打交呀？洗下面落樓食飯啦。」
阿文企起身，抓下個頭，唔係幾好意思咁講：「發咗個好奇怪嘅夢。姑姐，我哋一路行一路講。」

《全文完》