倍可親

標題: 董存瑞,十八歲,為國犧牲炸堡壘,炸到堡壘咯咯脆....細露哥時唱嘅廣州話歌仔,你仲記得嗎 [列印本頁]

作者: 格物便是致知 時間: 2010-11-24 19:11
標題: 董存瑞,十八歲,為國犧牲炸堡壘,炸到堡壘咯咯脆....細露哥時唱嘅廣州話歌仔,你仲記得嗎
最近喺網上掏到一批號稱"瀕臨滅絕的粵語童謠"..........

睇咗一下,基本喺我哋細個時日日唱嘅歌仔!

請各老鄉鑒賞:有*嘅歌仔,我細個時成日聽到......

1)落雨大 *
落雨大,水浸街,阿哥擔柴上街賣,阿嫂出街著花鞋,花鞋花襪花腰帶,珍珠蝴蝶兩邊排.排排都有十二粒,粒粒都係解放牌.

2)排排坐 *
排排坐,吃果果,貓衣擔凳比姑婆坐,坐爛個屎忽,唔好賴我,賴番隔離個二叔婆

3)捉大賊 *
點指兵兵,點指賊賊,點著誰人做大兵,點著誰人做大賊.

4)跳橡筋 *
董存瑞,十八歲,為國犧牲炸堡壘,炸到堡壘咯咯脆,全國人民流眼淚.

5)月光光 *
月光光,照地堂,蝦崽你乖乖瞓落床
聽朝阿媽要捕魚蝦啰,阿爺看牛要上山坡
哦哦哦...... 　
阿崽你快高長大啰幫手阿爺去看牛羊
哦哦哦...... 　
月光光,照地堂,蝦崽你乖乖瞓落床
聽朝阿媽要捕魚蝦啰！阿嫲織網要織到天光
哦哦哦......
蝦崽你快高長大啰撐艇撒網就更在行
哦哦哦......

6)點蟲蟲 *
點蟲蟲,蟲蟲飛,飛到荔枝基,荔枝熟,摘滿屋,屋滿紅,陪住個細蚊公.

7)氹氹轉 *
氹氹轉,菊花圓,炒米餅,糯米團,阿媽叫我睇龍船,我唔睇,睇雞仔,
雞仔大,摞去賣,賣得幾多錢?賣得三百六十五個仙.

8)猜呈沉 *
呈沉剪,呈沉包,呈沉糯米叉燒包.老鼠唔食香口膠,要食豆沙包.

9)騎牛牛 *
騎牛牛,牛牛走,牛牛響前咪回頭,若然回頭就打籮柚.

10)掟磚頭 *
掟磚頭,斗大夠,一掟掟到西門口,濺起浪花拋浪頭.

11)劈友 *
劈友,劈友,快啲走,走得快,好世界,走得磨,無鼻哥.

12)咕碌咕碌
紙皮紙皮打紙皮,上上下下左左右右前前後後,咕碌咕碌一,咕碌咕碌二,咕碌咕碌三,準備開炮打敵人！

13)拍大骳
拍大骳,唱山歌,人人話我無老婆,嘀起心肝娶返個,有錢娶個嬌嬌女,
無錢娶個豆皮婆,豆皮婆,食飯食得多,屙屎屙兩籮,屙尿沖大海,屙屁打銅鑼.

14)曖姑乖 *
噯姑乖 ,噯姑乖 ,噯大阿姑乖要嫁後街.後街有啲乜嘢賣, 有啲鮮魚鮮肉賣
重有鮮花戴 ,戴唔哂,落床頭畀老鼠拉 ,拉去邊 ,拉去大新街.

15)雞公仔 *
雞公仔,尾彎彎,做人新抱甚艱難！早早起身都話晏,眼淚唔乾入下間,
下間有個冬瓜仔,問安人老爺煮定蒸,
安人又話煮,老爺又話蒸,蒸蒸煮煮唔中安人老爺意,
大把拉鹽又話淡,手甲挑鹽又話鹹,三朝打爛三條夾木棍,四朝跪爛四條裙！
咁好花裙畀你跪爛,咁好石頭畀你跪崩!橫又難,直又難,不如捨命落陰間!
人話陰間條路好,我話陰間條路好艱難！

16)大食懶 *
大食懶,起身晏；洗冷水,食冷飯.

17)收買佬
收買爛銅爛鐵,收買舊報紙 ,收買爛銅爛鐵,收買舊報紙
舊報紙呀堆滿屋,舊仔呀擺滿廳,舊襯衫呀塞滿房,問阿媽呀點算好
舊也好新也好.舊與新都可變寶.賣了它即可變錢.若要錢搵收賣佬
收賣佬天天上路,沒理風吹兼雨打 ,一買一收一世樂,舊也好呀新也好
賣了舊報紙買噹噹糖,賣了舊仔買甘草欖,收買佬天天上路,舊也好他都當寶

18)阿公公
阿公仔,須扒扒,你飲酒,我飲茶,茶苦唔好食,酒醉唔好飲,我們快去外面玩泥沙.

20)斬料,斬料,斬嚿大叉燒.油雞滷味樣樣都要,斬嚿大叉燒,嘩！

21)打開蚊帳打開蚊帳,有隻蚊,有隻蚊,快啲羅個拍來,快啲攞個拍來,拍暈佢、拍暈佢.

22)一隻竹仔易折彎,幾隻竹仔欲折難,孤掌莫欺倚.團結方可有力量. 大眾合作不分散,千鈞一髮亦當閑,群策群力無猜忌,一期都好順利,好.

23)大西瓜、多好啊,個個都像吃,大家分、切開它,味道頂呱呱,唔小心、吞左啦,
圓圓幾粒啊哎呀呀,問媽媽、點算啊,頭頂長西瓜！媽媽、笑住話,******
從春天、到冬天,時時有西瓜.

24)醜醜醜,醜甩個耳仔送燒酒
豬頭丙,扮老醒,其實唔值個鬥擰
肥騰騰,買舊豬肉去拜神
以為佢好醒,原來系個豬頭丙；
以為佢好Fit,原來系個大水瀄

25)做個勇敢中國難民,吃錯奶粉打錯人,我為你犧牲你為我抽筋,終於瓜老襯！

26)又喊又笑 *
烏蠅打交
禽佬瀨尿
老鼠行橋
行到西門口
比人打羅友
.......(最後一句比較粗俗,就算了)

27)荷里活有間大酒店
三個肥婆學踢波
......(以下的不詳,望知者補上)

28)何家公雞何家猜：
真怪誕呀又有趣,阿望望公園裡,有四百隻公鷄咯咯咯,是何家都不知道,
何家公雞何家猜 ,何家小雞何家猜,何家公雞何家猜,何家母雞咯,咯,咯
猴子哥哥熊先生松鼠妹妹牛叔叔黃狗爸爸羊媽媽來猜來猜落

29)齊齊望過去：
齊齊望過去清溪里有隻青蛙想跳水,齊齊望過去山窿里有隻獅子竟飲醉........

作者: 世外閑人 時間: 2010-11-24 20:03
仲係你犀利，有滴唔識，有滴凈係識前面幾句咋。

作者: Djogchen 時間: 2010-11-25 00:24
評語！

有D未聽過
有D八十后
有D阿爺個代已經有咯！

總括：冇得頂!

作者: 格物便是致知 時間: 2010-11-25 05:36
回復世外閑人 2樓的帖子

恭喜你........你可能太後生啦..........哈哈

有*嘅歌仔,我細個時成日聽到........

作者: 格物便是致知 時間: 2010-11-25 05:39
回復 Djogchen 3樓的帖子

做阿爺都有可能係60后架.......

老細,有冇補充呀?

作者: Djogchen 時間: 2010-11-25 05:54
有D歌謠我BB時，阿嘛用黎氽我瞓覺伽！

補充呀?等我唸下先啦！

作者: 格物便是致知 時間: 2010-11-25 06:22
回復 Djogchen 6樓的帖子

敢耐仲記得?真定假架

作者: Djogchen 時間: 2010-11-25 07:08
回復格物便是致知 7樓的帖子

呵呵！珍珠都無甘真啊！依家仲浮系我腦海里！

作者: 格物便是致知 時間: 2010-11-25 07:23
回復 Djogchen 8樓的帖子

睇黎你個腦發育都幾早........記得敢多野

作者: 世外閑人 時間: 2010-11-25 18:34
回復格物便是致知 4樓的帖子

老兄，細細個玩個陣時，好少唱嗮成只歌，幾十年仲點記得啫。
我都想仲後生啊，可惜翻唔轉頭咯。

作者: 世外閑人 時間: 2010-11-25 18:35
回復 Djogchen 6樓的帖子

繼續補充啊，頂你嘅。

作者: 格物便是致知 時間: 2010-11-25 19:43
回復世外閑人 10樓的帖子

敢你吾夠Djogchen群主敢醒哩,佢記得七七八八.....仲喺BB個時聽返黎架....

佢話:"有D歌謠我BB時，阿嘛用黎氽我瞓覺伽！"

西飛利

作者: 世外閑人 時間: 2010-11-25 19:59
回復格物便是致知 12樓的帖子

群主Djogchen啵，啃係要服嘅。

兼且陸續有嚟，期待！

作者: 格物便是致知 時間: 2010-11-25 20:04
回復世外閑人 13樓的帖子

伸長條頸.....等啦

作者: 世外閑人 時間: 2010-11-25 20:11
回復格物便是致知 14樓的帖子

係喇，準備好鮮花之類迎接啦。

作者: jimmymai 時間: 2011-10-15 11:36
我都黎唱嚇先

光頭頭，滑漏漏，一分錢，買二舊，留翻一舊比老豆，老豆話你光頭頭。

爽滑涼粉，食壞女人，男人有益，女人生積。

作者: 格物便是致知 時間: 2011-10-25 08:51

jimmymai 發表於 2011-10-15 13:36
我都黎唱嚇先

光頭頭，滑漏漏，一分錢，買二舊，留翻一舊比老豆，老豆話你光頭頭。

好野,犀飛利

作者: jimmymai 時間: 2011-10-26 15:02
回復格物便是致知 17樓的帖子

多謝你帶我返到細細個就真

，好似仲有

氹煅子姜你阿婆纏腳娘抓支槍去打仗

作者: li夢妮 時間: 2011-11-4 09:43
八月十五是中秋，有人快活有人愁，有人豬肉煲蓮藕，有人跌親個羅柚。

作者: li夢妮 時間: 2011-11-4 09:46
各人之所好，有人擔遮行窄路，有人剃蘇長鼻毛，有人大肚去跳舞。

作者: hr8888hr 時間: 2012-3-31 21:03
越秀山邊,有間學校,有個老師,瘦骨如柴....................

歡迎光臨倍可親 (https://big5.backchina.com/)