量子在

https://big5.backchina.com/?372146

短篇評彈《遇仙記》

作者：量子在於 2017-9-6 04:42 發表於最熱鬧的華人社交網路--貝殼村

作者分類:彈詞腳本|通用分類:原創文學

關鍵詞：《遇仙記》, 短篇評彈, 順治, 董娘娘

說明：同名小戲劇本的結尾處理為悲劇，與忠實於原著的短篇彈詞有所不同。

短篇評彈《遇仙記》系根據蒲松齡聊齋志異吳門畫工創作而成。另有同名小戲劇本。

——建議安排單檔演出此短篇評彈，當然根據劇團具體情況也可安排雙檔。

（說表）清朝順治十四年間。就勒浪我伲蘇州地界吳門有一格畫工，姓朱，就是伲評彈界琴調創始人朱雪琴老前輩格朱——阿作興是俚祖浪向啥人呢，現在已經搞弗清爽哉。為啥呢？因為迪格畫工格名字弗曾傳下來歇。大家只是叫俚朱司務。

朱司務既然是格畫工末，格末俚究竟畫點啥末事呢，叫啥畫格既弗是山水也弗是花草既弗畫啥扇面也弗畫啥補壁。一般格人是想弗著格，阿曉得俚畫格物事乃是「喜容」。格末啥叫啥喜容呢，翻譯成為近代格語言就是遺像。

要是擺勒浪現在格辰光，格是便當煞格事體。用弗著請啥畫工！有老早就準備好格標準像拿一張出來就是！講到標準像，格弗是大老倌伊拉專用格，啊？現在平常草根百姓人家屋裡也有準備好格。就是我伲一條弄堂里廂有位老太九十開外年紀，勒浪八十大壽做生日格辰光就順便拍了交交關關格黑白照片，橫揀豎揀揀仔一張出來末放大準備到辰光好掛勒浪牆頭浪向。自家先看中意哉。還有種人就是碰著仔惡時辰，突然亡故來弗及照相也弗要緊格。尋一張原先有勒浪格照片去翻拍放大就一切舒齊。

不過閑話要講轉來，勒浪清朝順治年間是唔撥啥照相迪種事體。就算是後來我伲中國人見識到照相機也要到慈禧太后格朝代再有。拍仔姜文格一部電影「陽光燦爛的日子」封為影帝格夏雨就有一部電影叫做「西洋鏡」大家弗曉得阿曾看過歇？迪格西洋鏡末就是照相機。從順治到光緒，當中橫里隔脫仔好幾代皇帝，所以末市場需要朱司務迪能樣子格專業畫工來畫喜容。

喜容喜容也就是遺像，交關重要。現在講起來末追悼會浪要擺一張，屋裡廂要掛一張，就是做好格墳墓格石碑浪向有種人家也歡喜化脫眼代價刻俚一張。不過勒浪清朝格辰光，頂頂要緊頂頂要緊格是勒浪齋祖宗亡人格辰光一定要有一張喜容。大正月里從年三十夜請出神像來一直到正月十七送神為止，總共十八天。早也供夜也供，格格名堂經叫做朝夕上祭。伊歇辰光強調「萬惡淫為首百善孝為先」，大家統統當一樁大事體，實在推板弗起。

格喜容呢，也弗是像現在迪能單單一格頭像。是要全身象格。弗相信，大家只要回想一想——唐國強主演格電視連續劇「貞觀長歌」里廂凌煙閣開國功臣格畫像一張一張全部是全身像！或者耐阿要講迪格是唐朝，格末再看「雍正王朝」——里廂格祖宗亡人一格格也是全身像。

所以講，朱司務格生意來得格好。為啥？一則來全身像要比頭像花辰光花功夫，一進一出迪格工鈿浪向上落弗少。二來末朱司務技術好，一級，方圓百里有名氣四鄉八鎮大家要請朱司務。好像現在格明星奧斯卡最佳攝影師能吃響。格奧妙勒浪啥場化呢？講穿仔末，關鍵是朱司務畫出來格喜容讓大家看了舒服。江南一帶格地方有一格方言用詞叫做死腔——就是講死下來格腔調總歸推板，弗好看。所以叫做死腔死腔。要畫得後生小輩親親眷眷大家滿意，格手裡廂功夫弗是一眼眼哦。

朱司務弗單單是技術好，人品也好。弗嫖弗賭也弗吃香煙弗吃老酒，收費合理公道信得過。只是有一樣，叫啥弗大地道——迷信。俚耐歡喜畫八洞神仙呂純陽呂祖格畫像，屋裡廂是牆頭浪向一張張掛滿。有格畫成豪氣衝天格劍俠形象，有格是文質彬彬格文士形象。偶像偶像，迪格就叫做偶像！呂洞賓就是朱司務格偶像，崇拜啊，崇拜得弗得了。

平常大家看得最多格是拜觀世音。倒弗大看見供呂純陽。其實，《聊齋志異》格作者蒲松齡老先生就曾經說過：「故佛道中惟觀自在（就是觀世音），仙道中惟純陽子（就是呂洞賓），神道中惟伏魔帝（就是關老爺）」。佛道仙道神道三家格代表人物。格是另外一種三個代表。朱司務就是相信呂純陽，是俚格忠實信徒。拿現在流行格閑話來講嘛——弗是迷非著名相聲演員郭德剛格鋼絲而是鋁絲。

朱司務弗單單是勒浪牆頭浪貼滿呂純陽格畫像，而且是勒浪心裡向時時刻刻思念仔格祖師呂純陽。朱司務迪種行當忙格辰光么忙煞，空下來格辰光倒也蠻多。俚耐一空下來就是去走街串巷，不過弗是去跑花街柳巷，而是一門心思想著阿有啥格機會碰得著呂祖格真身下凡。為啥俚要有迪格念頭呢？為來為去為仔呂洞賓迪格仙人與眾不同。別人家登勒浪仙山海島修仙煉道，俚叫啥歡喜遊戲人間。長早要到十丈紅塵來白相相。大家總聽說過格——呂洞賓飛劍斬黃龍；呂洞賓醉酒岳陽樓；倒還有來——呂洞賓三戲白牡丹。雖然說蘇州弗是啥湖南嶽陽河南洛陽，但是，講弗准足啊，說弗定有朝一日呂仙會得降臨姑蘇迪格風流繁華地富貴溫柔鄉。

今早仔天氣蠻好，手頭浪向畫喜容格任務老早結束。橫豎一格人，吃飽仔肚皮全家弗餓。鎖好房門出去兜兜。走大街串小巷，走到迪格場化，是郊外格一座破廟。廟末是破著點，不過原來倒是一座古剎。香火曾經蠻旺盛，後來破敗脫仔撥拉一群叫花子佔據作為伊拉登身格場所。

朱司務一看末，格是要進去看看交格。說弗定原先供格就是呂祖，正好去磕脫兩格頭，禱告禱告。認認地方下趟點再帶仔香燭來好正式參拜。踏進廟門到得佛堂浪向一看末，弗是道觀是佛寺。到底是啥格一位菩薩末也已經弄得面目全非。弗曾有啥住持知客，倒有一班叫花勒浪狼吞虎咽。雖然是剩菜殘羹，吃得邪氣開心。朱司務為人倒從來弗曾有啥等級觀念——為啥呢？俚喜容畫得多仔末想得穿哉——踏破千年鐵門檻終須一個土饅頭。隨便耐是啥皇帝丞相叫花強盜，到閻羅王面前一視同仁。所以說勒浪金庸格筆下頭，東邪西毒南帝北丐格南帝搭仔北丐是同等級別格。

朱司務就是以平常心來看待迪幫窮叫花，正勒浪想阿要施捨一眼小銅鈿做做好事格辰光——格歇辰光弗曾有啥格「壹基金」，慈善事業是個體行為。哪能曉得眼睛里廂掃著一個人，心裡廂會得一動。再仔仔細細定睛一看末，啊？！只見叫化堆里有一位身高八尺二寸，皮膚淡黃色，蠻和善格一張面孔，稍微有一點點麻不過一眼弗影響心目當中偶像格風度，三茈牙須越加顯得神采軒豁。特別是一雙眼睛炯炯有神晶光四射。朱司務是格畫工，俚懂格——眼睛是心靈格窗戶，迪能一雙眼睛絕對弗會是生勒浪普通人身浪向格。阿是呂祖俚曉得我今朝會得到此地來，特地遊戲人生等勒里迪座廟裡廂啊？叫啥一格人啊，有種事體弗好多想，多想仔末越想越鑽到牛角尖里。迪格賽過旅遊格辰光，格導遊對旅客講，大家來看啊包捺弗看弗像看了就像叫啥越看越像。何況朱司務是格超級鋁絲，越加著迷。

朱司務現在格心裡廂啊真是喜心翻倒。實在是心誠則靈，今朝總算撥我碰著哉——真叫做皇天不負苦心人。三步並作兩步走上去，雙膝跪倒，一面拜仔幾拜一面口中言道：弟子叩見呂祖。格格心目當中格呂祖倒弗曾開口，旁邊格一群叫花子統統捧腹大笑——有格甚至於連得剛剛吃下去格冷粥冷飯也噴仔出來。

朱司務心裡有數格，迪格是勒浪考驗我啊。我一定要經得起考驗格啊。又拜仔幾拜末抬頭對仔呂仙講：今朝總算撥我碰著仙人哉。仙人啊，請收下我做耐格徒弟吧。又是一陣羅嘈。仙人俚倒是只管弗開口。

本當仔末只要弗開口，神仙難下手。偏偏碰著仔朱司務，俚迪格人叫啥像仔「士兵突擊」里格許三多，認煞一條理偏弗肯回頭。只管一面叩頭一面喊師父。人家又弗曾收俚做徒弟，俚倒死人弗怪先叫上去再講。

格仙人只管弗理弗睬。俚拿格身體別到東，朱司務人就轉到東去磕頭；俚再拿格身體別到西，朱司務也就轉到西去磕頭。看樣子，今朝仔螞蟥叮牢鷺鷥腳——弗肯罷休哉。

想弗到倒仔幾格來回末，仙人總算開仔金口哉。只見迪格叫花子一隻右手勒浪牙須浪向一擼，開口言道：「我即呂祖，汝將奈何？」

朱司務格格心裡開心啊，馬上接腔——呂祖在上，容弟子稟告。（彈唱）
我末早也思來末晚也想，
心心念念想著耐格祖師呂純陽。
我從小就拿祖師來崇拜，
耐格畫像我是末畫仔几几化化張。
掛滿東牆掛西牆，
再掛南牆和北牆。
自家屋裡掛弗落，
各處散發送街坊。
從觀前街一直送到仔末閶門外，
再加上來來往往運河格航船浪。
（說表：擺到現在格辰光，真可以組織起來一個粉絲團！）
屋裡向是——
日日夜夜來祝告，
朝朝暮暮燒高香。
天底下格「鋁絲」稱頭名，
算得上是最最虔誠一畫匠。
今早有幸得遇耐仙師面，
也是我心誠則靈有名堂。
我自願拜在仙人名下當弟子，
我情願跟仔祖師雲遊背藥箱。
弗貪求啥點鐵成金格手指頭，
迪種銅臭念頭我從來未曾想。
（說表：有一個故事格，一格人也是碰著仔呂仙末，問俚想要啥，俚倒說就要耐一隻點鐵成金格手指頭，結果偷雞弗著蝕把米撥拉呂仙狠狠叫教訓仔一頓。）
我弗求高官厚祿立朝堂，
到頭來原是黃粱夢一場。
（說表：老早就聽說格，呂仙俚自家撥拉漢鍾離點化，就是因為仔一枕黃粱夢醒。做官做官，做到仔出將入相結果原本回到老路浪向。）
我弗想洞房花燭成雙對，
紅綃帳內端正好一位女嬌娘。
（說表：四大皆空，色即是空，色空色空，格是好好叫比李安格色戒要高出幾格層次得來。）
敬仰祖師法術廣，
聞說海上有仙方。
祈求師父發慈悲，
但求能夠如願嘗。
只要一粒長生不老仙丹藥，
讓我永遠弗會得去見閻王。
（說表：迪格人是弗好搭俚去碰頭格。）
弟子我若能免一死，
就可以始終追隨在你身旁！
（說表）迪格要求弗算過分，我想長生不老，也是為仔能夠追隨左右，搭耐有伴，弗是單單為仔我自家哦。其實末，朱司務幫人家畫喜容，看慣仔世態炎涼人情冷暖。對人生酒色財氣末有一點點想穿，只怕一樁事體。怕就是怕自家有朝一日也會得要有一張喜容。逃弗脫格，故所以末提出迪能樣子一格要求。現在要求提末提出來仔，弗曉得呂祖有啥格反應。阿會得也是碰著一鼻頭格灰噢。

（說表）朱司務說完仔末，一隻頭骷顱仰起仔望好仔呂仙勒浪等。迪幫叫花子又是一陣大笑。叫花子當中只有一個人弗笑，啥人呢？就是呂仙呂純陽。只見得俚朝旁邊走開仔幾步，對朱司務招招手，隱隱然耐跟仔我來醸。朱司務趕緊立起身來，跟屁蟲能跟牢仔呂仙到仔佛堂格一個角落頭。兩格人停下來，呂仙對朱司務再招招手。格意思是「附耳過來」。朱司務心裡向開心啊，格是搭仔孫悟空拜師傳道格辰光一式一樣。豪臊耳朵湊上去，只聽得仙師用低音勒浪說：「既然是耐能夠認得出我末，看來我搭耐還是有緣格。不過，這裡不是說話的所在，夜間自當相見。」

迪歇辰光，迪能一句說話聽見仔勒浪朱司務格耳朵里向，格格心裡向開心啊阿賽過六月里喝仔一碗冰糖水，哪哼？——叫做陰到骨里甜到心！正要開口表示感謝格辰光，啥叫啥眼睛一霎老母雞變鴨，就勒浪眼門前格呂仙人弗看見哉。啊？！格么真格是神仙，一點弗錯啊是仙人。再一想末，啊呀，我還弗曾曉得夜裡向碰頭是勒浪啥地方介？

朱司務一陣發獃，稍微清醒過來再兩隻眼睛捻一捻，看過來看過去一群叫花堆里根本看弗見有仙人哎。也用弗著再勒浪此地登下去哉。回到自家屋裡，飯也吃弗落茶也喝弗進，一門心思勒浪等呂祖降臨。

外面起更哉。等過一更天，又是二更天。過了二更天，就是三更天。本生仔倒蠻有信心，寧可信其有不可信其無，到三更敲過倒真格有點神思恍惚心裡向疑仔疑惑。埂轉一想末，弗好對仙師有疑心格。阿是好迪能樣子，格是忠心弗夠，趕快拿格心神定一定。硬撐精神繼續勒浪等下去，狠弗得拿兩根木簽子來拿格眼皮支起來。

敲四更天哉，依然是一點音訊全無。做過夜班格人曉得格，迪歇辰光最最熬人。正勒浪神困思倦欲尋好夢之際，一道金光，照亮滿房間。仙人來哉，朱司務精神大振睡意全消，趕緊伏地磕頭。磕好頭起身瞻仰仙姿——啊，完完全全搭仔自家畫格「純陽真人像」一般無二。頭戴方巾，身穿海青，足下雲履，腰系朱紅絲絛，背浪向斜插一把伏魔寶劍，一張白凈的長隆面孔，三綹青須，好一派仙風道骨！

朱司務耐末定心哉——啥叫啥仙人呀，仙人是弗會失信格。到底是我一片虔誠之心感動得呂祖下凡降臨到我迪間房子里來。只管等勒浪仙人從道袍格袍袖裡向拿出一粒仙丹吞下去耐末大功告成。

呂祖開口哉。「念子志慮專凝，特來一見。但汝骨氣貪吝，不能為仙。我使見一人可也。」格是文言文呀，迪格意思末是講看勒浪耐志誠之心，特地來見上一面。不過嘛，耐格骨相太俗過於貪圖吝嗇，是弗能夠位列仙班格。隔末實能吧，我來讓耐見上一格人。

朱司務心裡向一沉，想啥？我要討一粒仙丹是非分之想？！看來長生不老是弗會得有戲哉。弗曉得要引見一格啥人啊？只看見呂仙袍袖一揚，異香滿室。空中一朵祥雲冉冉而降。到底仙人呀，牆頭房頂是擋弗牢格。祥雲浪向立好仔一位麗人，大約三十歲模樣，正是一朵鮮花盛開格光景。身浪向全副宮妝打扮，頭浪雲髻高聳，儀態萬方還加是落落大方。朱司務只敢用眼梢甩過去瞄一眼，格種漂亮是一種叫人不敢逼視偏偏又舍弗得弗看格腔勢。

格位美人降落雲端立定身軀含笑不語。仙人倒又開口哉：「這一位便是董娘娘，你要看仔細了。」

朱司務一聽末求之不得。本來有點弗敢有點弗好意思，現在過仔明路，仙人關照格，格是任務呀。朱司務聽仔呂仙吩咐，耐末抬起眼睛仔細打量飽看一番。啊呀！隔末真叫做馬玉濤唱格一支歌里向格一句——看也看弗夠哉。（彈唱）
雲端落下仔格一位董娘娘，
九天仙女也只及俚腳跟頭。
耐看俚要比西施胖，
耐看俚還比玉環瘦。
耐看俚再比貂蟬白，
耐看俚更比昭君柔。
（說表：格是拿四大美女統統比下去哉。）
真要教月里嫦娥偷落淚，
真要叫海底龍女暗害羞。
增之一分嫌忒過，
減之一分欠運籌。
迪能標緻格面孔何處找？
迪能勻稱格身段落里求？
最最喜氣是俚格怡然含笑樣，
讓我伲凡夫俗子也敢往前湊。
渾身上下弗見驕嬌二氣存，
眉梢眼角只有甜情蜜意透。
若是能搭俚共度春宵一夜天，
（說表：現在叫做419——for one night。）
哪怕是牡丹花下死做鬼也風流！
阿有啥更夫耐五更鐘點晏歇敲，
阿曉得我是看也實在叫是看弗夠！（備註：最後半句可以考慮採用馬玉濤歌曲演唱時的落腔拖腔。如決定採用此建議則末句改為——阿曉得我實在是看也看不夠。同時可再接一句說表：倒惹俚唱起「馬兒啊，你慢些走」來哉。）

（說表）迪歇辰光，啥格色戒色空啦弗敢去見閻王啦統統撥拉朱司務丟到仔九霄雲外——格格末就叫做色膽包天，不可抗拒格誘惑。朱司務是格畫工呀，閱人之多看過格人是弗弗少少。倒是從來弗曾看見過歇迪能格一格女人！弗單單是漂亮，而且俚一雙眼睛生得好極——大凡漂亮格女人驕嬌二氣在所難免，為啥呢？俚篤清爽自家格身價總歸要流露出來一副與眾弗同格樣子。但是，迪位董娘娘俚弗！耐弗管啥人，望過去只會覺得親近。就像是看見仔自家格親娘自家格阿姐。大家倒想想看，一個絕色美女，又有仔耐親娘格慈祥阿姐格關懷但是亦弗是耐親娘阿姐弗會得亂倫格，迪種樣子格三結合假使再加上仔頂尖格床浪功夫末實在是天浪少有人間絕無！

正勒浪朱司務情不自禁痴心妄想格辰光，只見董娘娘掩口莞爾一笑。迪格當口，耐董娘娘好笑格？朱司務本來已經人木脫格哉，再撥耐一笑百媚生格是要顛倒眾生。正勒浪朱司務弗曉得自家阿要蠢蠢欲動阿會得做出啥越軌行為格辰光，只覺得一樣物事黑乎乎格撲面而來。「啪」格一記，阿殼張吃仔一記耳光呀。低頭一看末，地浪向自家格一本畫冊。抬頭一看末，祖師面色鐵板顯露不悅。曉得自家心動神知，格是瞞弗過仙人格。所以要吃生活，格是懲罰我非分之想。再定睛一看末，叫啥董娘娘已經影蹤全無。

仙人面孔板板，又開出口來：董娘娘的面容，可記得否？朱司務想，我倒想講還弗曾看明白拉里，阿好讓我再看看。自家曉得格是弗可能格，就老老實實恭恭敬敬回答一聲：是格，已經記明白了。格末就叫做朱司務格本事——一級畫工呀。

「當真？」
「當真。」
「既然如此，你且聽了——天亮之後你速將董娘娘畫像完工，待等三年之後攜帶進京自有效驗。」

朱司務正要想問阿有啥等樣格效驗呢，只見呂仙說完要走，急忙上前想要攔牢問問清爽末，阿曉得一腳踏空。再一看末，自家復回塵世，原來是南柯一夢。

夢雖然醒哉，不過人仍舊勒浪夢裡頭弗肯退出來呀。耐看，一本畫冊明明是勒浪地板浪向躺好仔點。想起仔呂仙關照格任務，仔仔細細回想一番董娘娘的音容笑貌服飾打扮，面孔也弗揩早飯也弗吃馬上檯子攤開來，筆墨端正好。用用心心一口氣拿迪張畫像畫好。自家看看覺得正稱得上得意之作。為啥呢？一是用心，功夫化仔下去！二是上勁，歡喜做格事體搭仔為仔柴米油鹽開伙倉當然是絕然弗同。畫末是畫好仔，倒是弗敢掛出來，只好勒浪夜深人靜格辰光有趟把從箱子里拿出來看看過過乾癮。秀色可餐，看看也好格啊。

一等等仔三年。朱司務牢牢記住呂祖格關照，一到辰光收攤打烊。對別人只講要出門去旅遊。別人也弗曉得究竟會有啥花樣經，想來俚賺夠仔銀子末，動仔遊興哉。

朱司務下津橋運河渡口上船一路搭乘航船到通州上岸。有任務在身，也弗敢去想啥格順帶便遊山玩水。格格一日到仔京城，落腳勒浪蘇州會館。

自家也弗曉得到底仙人要俚迪歇辰光到京城來作啥。不過，人既然已經來格哉——既來之則安之。倒也定定心心。準備明朝去打聽打聽琉璃廠什剎海大柵欄哪哼格走法，可以安排安排一個京城旅遊計劃。前清格歇辰光，皇宮——現在叫故宮搭仔圓明園（現在格圓明園廢墟）還有天壇等歇場化老百姓是弗允許進去格。

阿殼張第二天一早起來，蘇州會館里向大家議論紛紛。在勒浪講非比尋常格一樁事體——順治皇帝格皇貴妃董鄂氏不幸因病仙逝。本來嘛，後宮里向死脫個把女人談弗上是啥大事體，也弗是貴為國母格皇後娘娘。

朱司務耳朵半邊豁著一個董字嘛，倒著進耳朵哉。啊？！阿會得是董娘娘介？！耐末弗去打聽啥格琉璃廠什剎海大柵欄哉。豎好仔格耳朵仔仔細細格聽下去。（彈唱）
叫啥子末希奇希奇真希奇，
格樁事體前朝六代未曾聞。
迪位董鄂氏出身秦淮河，
（說表：原來俚乃是秦淮八艷之一。）
董小宛三字名氣響得來斜斜能。
輾轉進入皇宮內，
太後身旁侍晨昏。
少年天子偶得遇，
一見傾心驚天人！
從此君王有知音，
心心相印共鴛枕。
（說表：有仔紅顏知己哉，「長信宮中，三千第一」「昭陽殿里，八百無雙」。）
真是六宮粉黛無顏色，
三千寵愛在一身。
誰知天不從人願，
膏盲之疾臨宮門。
不幸一病身亡故，
多情皇上哭斷魂。
千呼萬喚喚不歸，
「端敬皇后」來追尊。
（說表：叫啥前朝崇禎皇帝辰光出仔一格揚州瘦馬田貴妃，現在超出，秦淮歌妓當中出仔一個皇後娘娘！）
惟有一事為遺憾——
未有畫像伴餘生。

（說表）格格皇帝啊，除開議定鎰號孝獻庄和至德宣仁溫惠有十格字之多，別樣格腦筋挖空心思動出來全部辦得到，葬禮要多少隆重就辦到多少隆重。董娘娘黃泉之下要人服侍，三十名宮女太監殉葬，格是殘酷啊。要有地方住，專門盛飾奇珍異寶格一座精舍付之一炬。迪格就是滿洲貴族喪葬習俗里格「大丟紙」。還弗算數，「大丟紙」之外還有「小丟紙」——就是拿董娘娘生前睡眠服御之物統統燒脫。桂圓大格珍珠指頭大格寶石盡皆焚化。一眼眼也弗肉痛哎。

但是，就是有一樁事體嘛，銅鈿銀子再多也唔沒辦法可想。就是董娘娘格喜容唔撥著落。董娘娘生前也弗曾留下來啥格畫像。耐末只好想格極辦法——叫董娘娘生前所住承乾宮裡弗曾殉葬格宮女太監統統召集勒一道提供信息，再彙集京城有名氣格畫工大家一道來根據提供格信息來描畫。阿有啥就像仔公安局裡畫嫌疑犯一式一樣哉。

一眼弗錯，格末也像仔公安局畫嫌疑犯是弗可能畫得像到落里去格。耐倒想想看，大家七嘴八舌，迪格講眉毛要迪能彎過來，伊格講眼睛要格能瞄過去。耐是苦煞仔迪班畫工，也弗好罷工格。偏偏是好弗容易大多數人講蠻像哉，皇帝跑過來一看，仍舊弗稱心呀。氣得皇帝發閑話——再畫弗好，要對捺弗起哉。承乾宮裡是一片哀號，弗曉得畫畫迪種事體越急越弗來三。眼看是要唔不戲唱哉。

朱司務聽仔末，耐末開心啊。原來呂祖掐算陰陽老早就曉得董娘娘壽限，三年之前就安排好哉。格是便當煞格，畫箱里拿出來就是！完成仔呂祖交待的任務，同時也是做樁救苦救難格好事體。倒是要打聽一條路子，自家是弗好直逼逼到金鑾殿去見皇上格。

朱司務一打聽嘛，倒是湊巧——奉旨根據「御制端敬皇後行狀」寫傳記格金三俊金中堂也是蘇州地界吳江人。通過仔格蘇州會館到金中堂府浪，金大人一聽之下就講：豪臊拿出來瞻仰瞻仰。一見之下耐末確實相信。為啥？迪幅畫像有靈氣格，顧盼自如栩栩如生活脫活像一格活人立勒浪面前。再一想末，還有呂洞賓呂仙格指點，絕對放心好哉。迪格事體弗好尋開心呀。萬一送上去，一眼弗像格是惹毛皇帝弗得了呀。現在定心哉。

果然弗出所料，金三俊拿董娘娘格畫像上呈御前，皇帝一看末破涕為笑，驚喜莫名。馬上傳示六宮，叫啥唔不一格人表示疑義，異口同聲講像，像，像得弗得了啊！

其實末，耐皇帝老倌已經講仔像末老早通過哉，大家順水推舟何必說弗呢。馬上順治傳旨重賞朱司務。賞格是「奉特旨授為內閣中書」—— 內閣中書雖說是記錄記錄翻譯翻譯，但照樣字裡行間可以參與機務格，有權柄格。啥人曉得朱司務並弗領情呀，對來傳旨格金三俊講要辭官弗做——理由便是「弗懂得哪哼做官」。倒也有道理呀，其實俚耐自家有數，做官啥介好做格？弗要爬得高跌得重！

金三俊曉得俚格心思，自家替皇帝辦好迪件大事體也是朱司務格來頭格是無論如何要幫伊忙格。明朝早朝格辰光，上朝宛轉對皇帝講仔朱司務只求富弗求貴格心思，皇帝照準。改賞一萬兩銀子撥拉朱司務。

朱司務得到格實惠還弗僅僅是到此為止。衣錦榮歸外加還有四個字——就是前一腔一檔電視節目格名稱——名聲大振。弗論遠近特別是有銅鈿有身價格人家板要來請朱司務，酬金還要別苗頭。為啥么？皇帝出仔一萬兩銀子，我伲出弗到一萬，打格一折末起碼起碼也要出到一千。有格再往上抬抬末，快煞仔哎，弗到半年潤筆之資已經今生迪世用弗光哉。

朱司務就此歇業，搭仔俚格恩公呂仙一樣雲遊四方。據蒲松齡老先生講勒浪山東萊蕪有一位朱拱奎曾見其人。究竟哪哼，尚有待考證。

短篇到此結束。請聽下檔。